Ralga yasabye ko ibishushanyo mbonera by’imijyi yunganira Kigali bishingira ku byifuzo n’ubushobozi by’abaturage

Yanditswe na Akimana Jean de Dieu
Kuya 9 Kanama 2018 saa 08:25
Yasuwe :
0 0

Umunyamabanga Mukuru w’Ishyirahamwe ry’Uturere n’Umujyi wa Kigali (RALGA), Ngendahimana Ladislas, yavuze ko gukora ibishushanyo mbonera by’imijyi hatagendewe ku bitekerezo by’abaturage bibagiraho ingaruka, yibutsa abagize inama njyanama mu turere turimo imijyi yunganira Kigali ko bafite inshingano zo gukorera abaturage ibyo babatumye.

Yabigarutseho ubwo kuri uyu wa Gatatu tariki 8 Kanama 2018 ubwo mu Karere ka Muhanga hasozwaga amahugurwa y’iminsi ibiri yagenewe abahagarariye inama njyanama mu turere dutandatu turimo imijyi yunganira Kigali. Utwo ni Nyagatare, Musanze, Muhanga, Huye, Rubavu na Rusizi.

Ngendahimana yabibukije ko bagomba kujya batambutsa ibitekerezo by’abaturage, no kurebera hamwe ibyihutirwa bigomba gukorwa ariko byagizwemo uruhare n’abaturage birimo n’ibishushanyo mbonera by’iyi mijyi.

Yagize ati "Icyo dushaka ku mujyanama uri mu Nama Njyanama y’Akarere ni uko agomba kujyana ibyo abaturage bamutumye ku mishinga bifuza igomba gukorwa ku ikubitiro kuko abaturage bo muri iyi mijyi itandatu yunganira Kigali bazahabwa umwanya mugari mu itegurwa ry’ibikorwa bashaka ko bibakorerwa ndetse n’ibyahindurwa bikagendera ku gushaka kw’abaturage n’inyungu babifitemo".

Yongeyeho ko inama Njyanama igomba kwibuka ko igishushanyo mbonera ku mijyi yunganira Kigali gikwiye gukorwa hakurikijwe ibitekerezo by’abaturage ndetse n’ubushobozi bwabo, kuko ari bo bafite kugena imikorere n’imikoresherezwe y’aho batuye.

Yakomeje agira ati “Izi nama Njyanama ni zo ubundi zigomba gukora ibi bishushanyo mbonera ubundi bakunganirwa n’izindi nzego zirimo Ikigo gishinzwe Imyubakire na Minisiteri y’Ibikorwa Remezo kandi bigakorwa hakurikijwe ibyifuzo by’abaturage bigendanye n’ubushobozi bwabo, kuko nibo baba bafite kugena imikoreshereze yaho bari batuye.”

“Ikindi ni uko aho byakozwe nabi bikwiye guhinduka kuko umuturage niwe wa mbere ukwiye guhabwa ijambo mu gutunganya iyi mijyi bigakorwa n’aba bajyanama babahagarariye ari nabo bageza ibyifuzo byabo aho bigomba kugezwa kandi ntawe ubangamiwe".

Umuyobozi w’ibiro by’Inama Njyanama ya Rusizi, Nadine Michele Ingabire avuga ko aya mahugurwa agiye kubafasha kunoza imitunganyirize y’iyi mijyi n’inama njyanama zikubakira ku makuru ziba zavanye mu bo zihagararaiye.

Yakomeje agira ati "Inama njyanama ni zo zifite inshingano zo gufasha abaturage mu kubatangira ibitekerezo byabo no kubinonosora bigahabwa umurongo nyawo.”\

“Akenshi wasangaga bikorwa cyane n’abatekinisiye ariko ubu turahumutse tugiye kurebera hamwe uko twashyira ibintu ku murongo kuko Inama Njyanama ibereyeho abaturage n’ibikorwa byayo bigomba kujyana n’ibyifuzo byabo, ni ikosa kujya mu Nama Njyanama udafite ishusho yibyo abaturage bifuza ko mwabakorera".

Mu bihe bitandukanye abaturage bakunze gutunga agatoki izi Nama Njyanama ko baheruka bazitora, batajya bazibona ari naho bahera bavuga ko ibyifuzo byabo atari byo bishyirwa imbere.

Imijyi itandatu yunganira Kigali yitezweho kongera imibare y’abatuye mu mujyi aho mu mwaka wa 2014 abari batuye mu mijyi bageraga kuri 17% ndetse bikagaragara ko buri mwaka abatuye mu mijyi biyongeraho 4,5%, aho byitezwe ko mu mwaka wa 2020 abazaba batuye mu mujyi wa Kigali n’indi iwunganira bazaba bageze kuri 35%.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza