Raporo ku ireme ry’uburezi ishobora gutuma kaminuza zirenga 10 zihagarikwa by’agateganyo

Yanditswe na Philbert Girinema
Kuya 17 Werurwe 2017 saa 01:38
Yasuwe :
1 0

Hashize iminsi igera kuri ibiri Kaminuza ya Gitwe ihagarikiwe amashami atatu ihita isaba abanyeshuri bayo gutaha bagasubira iwabo mu ngo hanyuma igihe cyo gusubukura amasomo bakazakimenyeshwa nyuma y’ibiganiro izagirana na Minisitiri w’Uburezi.

Kuri uyu wa Kane mu Ruhango kuri iri shuri, abanyeshuri bari baheze mu gihirahiro bibaza uburyo bagiye gusubira iwabo ndetse n’abari hafi yo gusoza amasomo bibaza uko bizabagendekera.

Ibi byabaye nyuma y’aho ubuyobozi bw’ishuri bubahamagaje mu nama y’igitaraganya yo kubabwira umwanzuro wa Minisiteri y’Uburezi urimo ihagarikwa ry’agateganyo ry’ishami ryigisha ubuganga, irya Laboratoire ndetse n’Ishami ry’Ubuforomo.

Uyu mwanzuro uraca amarenga y’ibyaganiriweho mu nama y’Igihugu y’Umwiherero w’abayobozi bakuru uheruka kubera mu kigo cy’imyitozo ya Gisirikare i Gabiro mu Karere ka Gatsibo.

By’umwihariko ibiganiro byo kuwa 28 Gashyantare 2017 mu Mwiherero byibanze ku bijyanye no kuzamura ireme ry’uburezi mu Rwanda. Aha Minisitiri w’Uburezi, Dr Musafiri Papias Malimba; Dr Innocent Sebasaza Mugisha uyobora Inama Nkuru y’amashuri makuru na za Kaminuza (HEC); Gasana Janvier uyobora Ikigo cy’Igihugu cy’Uburezi, Umuyobozi Mukuru wa Kaminuza y’u Rwanda,Prof. Phil Cotton na Prof Manasse Mbonye bahawe umwanya.

Mu kiganiro n’abanyamakuru gikurikira Umwiherero, Minisitiri w’Uburezi yavuze ko harebwe ku nzego uburezi bwashoboye kuzamukamo n’ibyo bugomba kongeramo imbaraga, hemezwa ingingo eshatu zatuma ireme ribasha kuzamuka, hakarengwa ubwitabire bw’abanyeshuri gusa.

Ati “Icya mbere ni ukunoza ubugenzuzi bw’imyigire, imyigishirize n’isuzumabumenyi mu byiciro byose by’uburezi, haba mu mashuri abanza, ayisumbuye, imyuga n’ubumenyingiro, ndetse by’umwihariko amashuri makuru na za kaminuza.”

“Icya kabiri kigomba kwitabwaho ni uguhuza inyigisho n’ibikenewe ku isoko ry’umurimo, icya gatatu ni uguhuza inyigisho zitangirwa mu mashuri makuru na za kaminuza ndetse n’ibikenewe mu ngaga z’abanyamwuga.”

Aha yatanze ingero ku mashuri yigisha iby’ubuvuzi, hakibandwa ku kureba uburyo bihuzwa n’ibikenerwa n’ingaga z’abanyamwuga ku rwego rw’ubuvuzi, kimwe no ku rwego rw’ibaruramari n’icungamutungo, ubutabera n’izindi.

Mu Mwiherero, Dr Innocent Sebasaza Mugisha uyobora Inama Nkuru y’amashuri makuru na za Kaminuza (HEC); Minisitiri w’Uburezi, Dr Musafiri Papias Malimba; Umuyobozi Mukuru wa Kaminuza y’u Rwanda,Prof. Phil Cotton; Gasana Janvier uyobora Ikigo cy’Igihugu cy’Uburezi na Prof. Manasseh Mbonye bahawe umwanya basobanura ibijyanye n’uburezi

Hakozwe igenzura ry’ireme ry’uburezi, niryo riri gutuma Kaminuza zimwe zifatirwa ibyemezo

Dr Mugisha Sebasaza Innocent, uyobora Inama Nkuru y’amashuri makuru na za Kaminuza mu Rwanda (HEC), mu ntangiriro za Gashyantare yabwiye IGIHE ko hari igenzura ryakozwe muri za kaminuza n’amashuri makuru ku bijyanye n’ireme ry’uburezi, ko hari gukorwa raporo ku myanzuro yaryo ikazajya ahagaragara mu minsi mike.

Amakuru IGIHE ifitiye gihamya ni uko iyi raporo yashyikirijwe inzego zo hejuru z’igihugu ndetse igakorwaho isesengura ryimbitse.

Kuri uyu wa Gatanu tariki ya 17 Werurwe 2017, Mugisha na none yabwiye IGIHE ko iyi raporo ariyo iri kugenderwaho mu ifatwa ry’imyanzuro imwe n’imwe ndetse ko hari kaminuza zindi zishobora gufatirwa ibyemezo.

Yirinze kugira byinshi avuga ku ihagarikwa ryazo, ahubwo ko byose bizasobanurwa neza mu kiganiro n’abanyamakuru kizaba kuwa Mbere tariki 20 Werurwe 2017.

Ati “Hari amashami yahagaritswe muri za kaminuza zimwe bikurikije igenzura ryakozwe mu mpera z’umwaka ushize kandi ni mu buryo bwo gusigasira ireme ariko ikigo cyakuzuza ibyasabwe kigafungurwa.”

Yasobanuye ko iri genzura ryakozwe n’ikigo cyigenga ariko ibyashingiweho byari byemeranyijweho na Kaminuza hamwe n’amashuri makuru. Ati “Zirabyemera zikisuzuma zikanatanga uko zihagaze ziti ngaho muze muturebere mugendeye ku bipimo.”

Abajijwe niba hari izindi kaminuza zishobora guhagarikirwa amashami nkuko byagendekeye iya Gitwe, atazuyaje yagize ati “ Cyane rwose zigera mu icumi na…hariho buriya n’izitarahagaritswe ariko nazo zigasabwa ngo n’aha mwihwiture mukeneye kuminjiramo agafu, bityo bityo.”

Amakuru avuga ko Kaminuza Mpuzamahanga ya Rusizi, Nile Source Polytechnics of Applied Arts ikorera i Huye na Sinhgad Technical Education Society ku Kicukiro zafatiwe imyanzuro irimo guhagarikwa.

Kugeza ubu mu Rwanda habarurwa Kaminuza n’amashuri makuru abiri agengwa na leta ariyo: Kaminuza y’u Rwanda n’Ishuri rishinzwe guteza imbere amategeko (Institute Of Legal Practice And Development) mu gihe izigenga ari 35 arizo:

1. African Institute of Mathematical Sciences Rwanda (AIMS-Rwanda)

2. African Leadership University

3. Adventist University of Central Africa

4. Carnegie Mellon Rwanda

5. Catholic University of Rwanda

6. Christian University of Rwanda

7. College of Surgeons of East, Central and Southern Africa

8. East African University - Rwanda

9. Indangaburezi College of Education

10. Institut Catholique de Kabgayi

11. Institut d’Enseignement Supérieur de Ruhengeri

12. Institut Polytechnique de Byumba

13. Institute of Agriculture, Technology and Education of Kibungo

14. Jomo Kenyatta University of Agriculture and Technology

15. Kabgayi School Of Nursing And Midwifery

16. Kibogora Polytechniques

17. Kigali Independent University- ULK

18. Kigali Institute of Management

19. Mahatma Gandhi University - Rwanda

20. Mount Kenya University

21. Ngoma Adventist College of Health Sciences

22. Nile Source Polytechniques of Applied Arts

23. Open University of Tanzania

24. Premier Early Childhood Teachers Development College

25. Protestant Institute of Arts and Social Sciences

26. Ruli Higher Institute of Health Sainte Rose de Lima

27. Rusizi International University

28. Rwamagana School Of Nursing And Midwifery

29. Rwanda Tourism College

30. Sinhgad Technical Education Society

31. University of Gitwe

32. University of Global Health Equity

33. University of Kigali

34. University of Lay Adventist of Kigali

35. Vatel School Rwanda


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza