RCS itewe impungenge n’igabanuka ry’abasura abagororwa

Yanditswe na Kanamugire Emmanuel
Kuya 26 Ugushyingo 2016 saa 07:11
Yasuwe : XX
0

Urwego rw’Igihugu rushinzwe imfungwa n’abagororwa(RCS) rurakangurira Abanyarwanda kwitabira gusura ababo bafunze kuko bituma babona ko batabibagiwe.

Komiseri Mukuru wa RCS, CGP,George Rwigamba yabitangaje ku wa Gatanu tariki ya 25 Ugushyingo 2016, umunsi wahariwe isura muri gereza zo mu Rwanda.

CGP Rwigamba yavuze ko uko imfungwa n’abagororwa batinda muri gereza, imiryango yabo igenda idohoka, ubwinshi bw’ababasuraga bukagabanuka ku buryo rimwe na rimwe usanga hari abatagisurwa.

Ati “Ibyo bigira ingaruka, twibaza ko wenda impamvu ari ukurambirwa cyangwa ubukene, iyo babaze amatike abazana gusura abo… hari abo usanga imiryango yabo ituye kure y’aho bagororerwa.”

Ku ruhande rw’abagororwa bavuga ko hari ababa baheruka inshuti n’abavandimwe bagifungwa, bakatirwa bakagenda bamucikaho, bagatangira kwibaza niba babanaga n’abantu.

Umuyobozi w’Umuryango ukora ubuvugizi bw’abana bafunze Dignity in Detention, Mukansoro Odette, mu kiganiro na RBA, yavuze ko icyo kibazo iyo kibaye ku bana bibagiraho ingaruka zikomeye.

Ati “Abana ntabwo basurwaga na gahoro, twatangiye basurwa nko ku 10%, ubu bimaze kugera nko kuri za 60%.”Niba umwana abona ko ababyeyi be bamurakariye, bigorana ko ibindi bintu yakorerwa bishoboka, kuko ngo umuryango we ari wo uzakomeza gahunda yo kumugorora.”

Ati “RCS iragorora ariko umuryango utabigizemo uruhare nta kintu twazageraho kuko n’ubundi aba azasubira muri uwo muryango.”

RCS irasaba abafite abagororwa gukomeza kubasura cyane mu minsi mikuru kuko bibagarurira akanyamuneza no kumva batari bonyine.

Mu Rwanda hari gereza 14 zifungiyemo abagororwa basaga ibihumbi 55, harimo Gereza ya Nyagatare ifungiyemo abana. Iminsi yo gusura abagororwa ni ku wa Gatanu no ku wa Gatandatu ku bakozi n’abanyeshuri.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza