RDF imaze kuvura abatishoboye barenga ibihumbi 60 indwara batewe na Jenoside

Yanditswe na Bukuru JC
Kuya 16 Gashyantare 2017 saa 01:47
Yasuwe :
0 0

Ibitaro by’u Rwanda bya Gisirikare byatangiye mu Karere ka Ngororero, kuri uyu Gatatu, igikorwa ngarukamwaka cyo kuvura abatishoboye babana n’ubumuga n’ibikomere batewe na Jenoside yakorewe Abatutsi mu 1994, kimaze kuvurirwamo abarirwa mu bihumbi 60 kuva cyatangira.

Iki gikorwa kigamije gutanga ubuvuzi ku ndwara zitandukanye ku batishoboye babana n’ubumuga n’ibikomere batewe na Jenoside, kiri muri gahunda y’ubuvuzi y’ Icyumweru cy’Ingabo izwi nka “Army Week” cyafunguwe tariki 15 Gashyantare 2017 na Guverineri w’Intara y’Iburengerazuba, Munyantwari Alphonse ari kumwe n’abayobozi bo mu nzego z’ibanze, abayobozi ba FARG hamwe n’abayobozi b’inzego z’umutekano muri iyo ntara.

Umuyobozi w’Ibitaro by’u Rwanda bya Gisirikare, Brig Gen Dr Emmanuel Ndahiro, yavuze ko serivisi zitangwa z’ubuvuzi muri gahunda z’Icyumweru cy’Ingabo ari igikorwa cyashyizweho n’ubuyobozi bw’Ingabo z’u Rwanda ku bufatanye n’Ikigega gifasha abarokotse Jenoside yakorewe Abatutsi (FARG), hagamijwe kubigereza serivisi nziza z’ubuvuzi ku barokotse Jenoside hamwe n’abandi baturage batishoboye baba mu bice bitandukanye by’igihugu.

Ubwo buvuzi bwegerezwa abatuye kure, aho bigoye kugera ku baganga b’inzobere, kandi Igisirikare cy’u Rwanda gitangaza ko bumaze kugera kuri benshi.

Brig Gen Ndahiro yatangaje kuva 2012 izo serivise zitangira gutangwa kugeza ubu hamaze kuvurwa abarokotse Jenoside batishoboye barenga ibihumbi 60, bavurwa indwara zifitanye isano n’ibikomere basigiwe na Jenoside. Izo serivise zimaze gutangirwa mu turere 29.

Muri iyi gahunda y’Icyumweru cy’Ingabo irimo kubera mu Karere ka Ngororero, biteganyijwe ko abatishoboye barokotse Jenoside yakorewe Abatutsi bagera kuri 900 bazavurwa. Serivisi ziri gutangirwa ku Bitaro bya Muhororo n’ibya Kabaya.

Munganyimana Ancila w’imyaka 64 yatanze ubuhamya ko muri Jenoside yakorewe Abatutsi, yakubiswe n’abicanyi ku buryo buteye agahinda, akajugunywa muri Nyabarongo ariko kubw’igitangaza cy’Imana araraokoka nubwo afite ibikomere ahererwa ubuvuzi.

Yagize ati “Ndacyariho mbana n’ibikomere bidasanzwe natewe n’ibyo bihe. Dushimishijwe na serivisi z’ubuvuzi mwatuzaniye, mu by’ukuri turashimira Guverinoma yacu ku bw’umwihariko Perezida wacu Kagame uburyo atwitaho.”

Guverineri Munyantwari yasabye abaturage gukomeza gufata mu mugongo abarokotse Jenoside yakorewe Abatutsi no gutsura imibanire myiza aho batuye, bunga ubumwe kandi bafatanya mu kwiteza imbere.

Yashimye ubutwari bw’ Ingabo z’u Rwanda zahagaritse Jenoside no kuba zikomeje gufasha abaturage kugera ku mutekano usesuye, gufasha abaturage kugira ubuzima bwiza binyujijwe muri serivisi z’ubuvuzi, hamwe n’izindi gahunda z’iterambere Ingabo z’igihugu zigiramo uruhare.

Yagize ati“RDF yabaye intangarugero mu gutanga serivisi nziza ku baturage bacu ndetse no mu bumwe n’ ubwiyunge bw’abanyarwanda. Ni inshingano zacu twe nk’abaturage kubakira kuri uru rugero rwiza tukarushaho kubaka igihugu cyacu, duharanira imibereho myiza.”

JPEG - 240.2 kb
Umusirikare ari guha serivise z’ubuvuzi umuturage
Guverineri w’Intara y’Iburengerazuba, Munyantwari Alphonse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza