Kwamamaza

REB ishobora gukurikiranwa mu bushinjacyaha ku bw’ikosa ryo kwishyura miliyoni 51 z’ubusa

Yanditswe kuya 13-10-2016 saa 21:58' na Ntakirutimana Deus


Ubwo Ikigo cy’Igihugu gishinzwe Uburezi (REB) cyitabaga Abadepite bagize Komisiyo ishinzwe gukurikirana imicungire n’imikoreshereze y’Umutungo n’Imari bya Leta (PAC), kugira ngo cyisobanure ku makosa yagaraye muri raporo y’Umugenzuzi Mukuru w’Imari ya Leta y’umwaka wa 2014/2015, hari ikosa rimwe ubushinjacyaha bukuru bwavuze ko bugiye kugikurikiranaho.

Iryo kosa rimaze umwaka urenga rikozwe, rijyanye n’isoko REB yahaye imwe muri sosiyete zayizaniraga ibikoresho bya Laboratwari byifashishwaga n’abanyeshuri basoza amashuri yisumbuye mu bizamini ngiro (Practical Exam).

Iyo sosiyete yari yaratsindiye iryo soko, ikajya ibagemurira ibikoresho. Nyuma REB yaje kubona hakenewe bike, igena guhabwa bike, ariko ya sosiyete igakomeza kuzana inyemezabwishyu (invoice) y’ibyo bikoresho ku ngano yari isanzweho.

Urugero rutangwa ni uko niba iyo sosiyete yaratangiye izana ibikoresho 10, nyuma REB yabona bihagije ikayandikira ko bazajya bazana bitanu (bikoresho), iyo sosiyete yakomeje kuzana inyemezabwishyu y’ibikoresho icumi.

Ibyo byatumye ku mafaranga iyo sosiyete yagombaga kwishyurwa harengaho miliyoni 51 z’amafaranga y’u Rwanda.

Umuyobozi Mukuru wa REB, Gasana Janvier, yavuze ko iryo kosa baribonye, bakandikira iyo sosiyete, nayo ibandikira yemeza ko yabasabye amafaranga menshi, maze nabo bongera kuyandikira bayisaba kuyasubiza.

Nubwo iyo sosiyete yatangiye kwishyura ayo mafaranga ku buryo imaze kwishyura asaga miliyoni 34, abadepite n’Umugenzuzi Mukuru w’Imari n’Umutungo bya Leta ntibanyuzwe.

Abagize PAC babajije icyari kigamijwe mu ikorwa ry’ibyo REB yita amakosa ndetse inemera.

Yabajije ndetse n’icyakorewe uwakoze ayo makosa, maze Gasana avuga ko yavanywe muri komite ishinzwe imitangire y’amasoko muri REB, ariko ko agikora muri icyo kigo.

Perezida wa PAC, Nkusi Juvenal, akimara kumva ko uwo mukozi agikora muri REB yabitinzeho agira ati “ Ibyo ni ubushishozi cyangwa ni ukuregeza ( koroshya ibintu mu buryo bwo kutabyitaho) ni ukubabarira?”

Depite Kankera Marie Josée yavuze ko iki kigo gifite ibibazo mu bijyanye no gutanga amasoko.

Gasana yahise avuga ko abakoraga mu ishami ryari rishinzwe ibijyanye no gutanga amasoko bahinduwe, bagahabwa indi myanya muri icyo kigo.

Ibyo ntibyanyuze Depite Karemera Jean Thierry, wahise abaza ati “ Guhindura ni cyo gihano aba bahawe ku makosa nk’aya?”

Gasana yamusubije ko hari abakozi babiri basezerewe n’abandi basabiwe ibihano.

Hamaze kuvugwa izo miliyoni 51 REB yishyuye icyo kigo bidakwiye, uwari uhagarariye Ubushinjacyaha bukuru (NPPA), yavuze ko icyo kibazo batacyihanganira.

Ati “Izo miliyoni ni nyinshi, kuvuga ngo habayeho ukwibeshya […] REB yagombaga kutubwira tukareba ko ari ukwibeshya gusanzwe cyangwa atari umugambi wo kurigisa. Bari kutubwira tukabikurikirana, ariko tuzabikurikirana ubwo byamenyekanye.”

Kuri uwo munsi REB yahaswe ibibazo byinshi ku makosa yagaragajwe n’Umugenzuzi Mukuru w’Imari ya Leta, ariko ibyinshi yagiye ibitangaho ibisobanuro ntibinyure abadepite.

Gasana Janvier yavuze ko nubwo bakoze iryo kosa batangiye kubishyura

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved