REB yaburiye ibigo bidakoresha smart classroom byarahawe ibikoresho

Yanditswe na Iradukunda Desire
Kuya 15 Gicurasi 2018 saa 09:37
Yasuwe :
0 0

Ikigo cy’Igihugu gishinzwe Uburezi (REB) cyatangaje ko gishobora gutangira guhana ibigo by’amashuri byahawe ibikoresho byo kwifashisha mu byumba by’ikoranabuhanga bizwi nka’ Smart Classrooms’ nyamara ntibikoreshwe.

Gahunda ya Smart Classroom yatangijwe hagamijwe guteza imbere ikoranabuhanga mu mashuri abanza n’ayisumbuye.

Urwunge rw’amashuri rw’abakobwa rwa Rambura ruherereye mu Karerere ka Nyabihu ni rimwe mu mashuri yahawe mudasobwa zifasha muri gahunda ya Smart Classroom. Nyamara igenzura abakozi ba Minisiteri y’Uburezi bamazemo iminsi ryagaragaje ko mudasobwa bahawe zidakoreshwa.

Abarimu bigisha muri iki kigo batangaje ko bakoresha izo mudasobwa mu gihe cyo kwigisha isomo rya mudasobwa gusa.

Ndacyayisenga Théogene, umwarimu w’ikoranabuganga muri icyo kigo yagize ati “Dukoresha izi mudasobwa mu gihe cyo kwigisha ikoranabuhanga ariko ntituratangira kuzikoresha mu yandi masomo nk’imibare,ibinyabuzima, ubutabire n’ibindi.”

Umuyobozi w’iki kigo, Nyinawumuntu Marie Goretti, yabwiye The East African ko abarimu bataratangira kwifashisha ikoranabuhanga mu yandi masomo gusa ngo biterwa n’uko hari ibikoresho batarabona nka Projecteur yifashishwa mu kugaragaza neza ibyigishwa.

Umuyobozi ushinzwe iterambere ry’ikoranabuhanga muri REB, Seth Buhigiro, yaburiye ibigo byahawe ibikoresho ntibikoreshwe ko bishobora guhanwa.

Yagize ati “Twamenye ko hakiri imyumvire mike ku bijyanye no kumva icyo iriya gahunda igamije n’umusaruro tuyitezeho. Ibikoresho birahari gusa ntibikoreshwa […] Birasa nk’aho abarezi n’abakoresha babo badashaka gukoresha ikoranabuhanga mu yandi masomo, gusa babe bitegura ibihano biri imbere.”

Buhigiro yatangaje ko Minisiteri y’Uburezi yamenyesheje uturere twose kugenzura ibigo byahawe ibikoresho bikaba bitabibyaza umusaruro, ibigaragaye bikabyamburwa bigahabwa andi mashuri abikeneye.

Smart classroom ni uburyo bwo kwigisha hakoreshejwe ikoranabuhanga bwatangijwe na ‘Africa Smart Investment’ hagamijwe kwinjiza ikoranabuhanga mu mashuri.

Iyi gahunda yatangiye mu 2016 ifasha buri kigo cy’ishuri kugira ibyumba bibiri aho buri cyumba kiba kirimo mudasobwa 50, zishyirwamo amasomo ari mu ikoranabuhanga ajyanye n’ubumenyi ndetse n’ururimi rw’Icyongereza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza