Kwamamaza

REB yananiwe kwisobanura ku mafaranga yashyizwe mu ideni kandi yarishyuwe

Yanditswe kuya 12-10-2016 saa 11:22' na Deus Ntakirutimana


Ubwo abayobozi bw’Ikigo gishinzwe guteza imbere uburezi, REB bitabaga Komisiyo y’Inteko Ishinga Amategeko, ishinzwe kugenzura imikoreshereze y’imari n’umutungo wa Leta, PAC, bananiwe gusobanura iby’amafaranga asaga miliyoni 50 yashyizwe mu ideni kandi yarishyuwe.

Icyo kibazo cyazamuwe ku wa Gatatu tariki ya 12 Ukwakira 2016, ubwo Depite Kankera Marie Josée yabazaga REB impamvu itishyura ba rwiyemezamirimo, ababaza uko babaho batishyurwa.

Raporo y’Umugenzuzi Mukuru w’Imari ya Leta y’umwaka wa 2014/2015 yagaragaje ko iki kigo cyerekanye ko gifitiye rwiyemezamirimo wagihaye ibikoresho, umwenda wa miliyoni 110 z’amafaranga y’u Rwanda.

Nyuma Umugenzuzi Mukuru w’Imari n’Umutungo bya Leta yasabye REB ibisobanuro ku bijyanye n’uwo mwenda, maze yisobanura ko ideni risigaye ari asaga ibihumbi 50, kuko yishyuye rwiyemezamirimo agera kuri miliyoni 50 ariko bakibagirwa kubyandika mu bitabo by’ibaruramari.

‘Kwibagirwa kubyandika’ byatangaje cyane

Perezida wa PAC Juvenal Nkusi wahise yifata ku munwa arababaza ati “DG (Muyobozi Mukuru),uzi mu icungamutungo kwibagirwa icyo ari cyo?”

Abagize PAC bakomeje kubaza icyari kigamijwe mu kutandika ayo mafaranga.
Nkusi ati “Intention(icyari kigamijwe) yari iyihe, uwo wari uberewemo uwo mwenda nta muyobozi wamufashije ngo yishyurwe?”

Umugenzuzi Mukuru w’Umutungo n’Imari bya Leta, Biraro Obadiah yahise agira ati “ …(Izina rya sosiyete) yaravuze iti ntimuzanyibishe.”

Ibyo biganisha ku kuba baranditse amafaranga arenze ayo bamurimo. Aho ndetse yakomoje ko ayo mafaranga ashobora kuba yari mu nzira zo kunyerezwa, biciye mu kwishyurwa maze ubutaha akaba yanyerezwa.

Nkusi yavuze ko akurikije ibibazo bitandukanye byagaragaye muri REB hari ibyo kwitondera.

Ati “Ubugenzuzi bupfuye kandi buzateza ikibazo umunsi umwe!”

Muri iyo raporo kandi hagaragaye andi mafaranga agera kuri miliyoni 268 zarenze ku yo REB yagombaga kwishyura ba rwiyemezamirimo batandukanye.

Umuyobozi Mukuru wa REB, Gasana Janvier yemeye amakosa yakozwe ariko avuga ko bagiye kwikosora.Ati “ Turemera amakosa yakozwe”.

Muri iryo bazwa hagarutswe ku bijyanye no gukoresha uburyo bwifashishwa mu icungamari. Umuyobozi ushinzwe imari muri REB yagarutsweho kenshi, kugeza abajijwe amashuri yize, ndetse n’urwego agezeho mu bumenyi buhanitse mu bijyanye n’icungamutungo.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved