Kwamamaza

REB yahaswe ibibazo kuri miliyari 30 Frw z’amasoko 140 yasabye, igakora 8 yonyine

Yanditswe kuya 15-10-2016 saa 15:04' na Ntakirutimana Deus


Ikigo cy’Igihugu gishinzwe Uburezi(REB) cyahaswe ibibazo ku ngengo y’imari ya miliyari 30 cyakiye amasoko 140 kigakoramo umunani yatwaye miliyari zisaga 24 z’amafaranga y’u Rwanda.

Ubwo iki kigo cyitabaga PAC tariki ya 13 Ukwakira ku bijyanye n’imicungire mibi y’ingengo y’imari y’umwaka wa 2014/2015, hagarutswe ku kayabo cyasabye nk’ingengo y’imari ya miliyari 42, izigera kuri 30 zigenewe amasoko ariko na yo agera ku 132 ntakorwe.

Ibyo byatumye Abadepite bagize PAC bahata REB ibibazo bitandukanye, ndetse bamwe bibaza niba iki kigo gikora akazi ko gutanga amasoko gusa.

Depite Kankera Marie Josée yasobanuriye iki kibazo PAC ati “Nyakubahwa Perezida, aba bantu bafite ikibazo mu igenamigambi ry’amasoko kinakomeye nk’uko bigaragara. Bakoze igenamigambi ry’amasoko 140 ahwanye na miliyari 30 bafite ingengo y’imari ya miliyari 42.”

Kankera yakomeje agira ati “Ariko ubundi REB mwatanga amasoko 140 mu mwaka ni ko kazi mukora gusa?”

Nyuma y’uko abadepite bakomeje kugaragaza ibibazo muri ayo masoko, Perezida wa PAC, Depite Nkusi Juvenal yaratangaye.

Ati “Ibi bintu bibaho, muri iki gihugu cyacu, koko se, amasoko 140, 132 ntakorwe, 8 akaba ariyo akorwa. Ubwo mwagiye gusaba ariya mafaranga yo gukora amasoko muzi ibyo mushaka? Ushobora kugera kuri 60, 70, ariko mu masoko 140, umunani akaba ariyo akorwa?”

Ayo masoko 140 REB yari yateganyije ko azatwara asaga miliyari 30 z’amafaranga y’u Rwanda, yakozemo umunani yatwaye asaga miliyari 24 na miliyoni 800.

Nkusi amaze gutangara no kubahata ibibazo, Umuyobozi Mukuru wa REB, Gasana Janvier yavuze ko ayo makosa ndetse n’andi atandukanye yari yagaragajwe mbere bayemeye kandi bayasabira imbabazi.

Ati “Nyakubahwa Perezida [wa PAC], ntabwo nari kubihakana kandi byarabaye.”

Nkusi ati “Ari ukuri, impamvu ushobora kuyibona , urumva byakumvikana gute? Ari wowe ushinzwe gucunga imari y’ikigo baguhaye ngo ukiyobore, ugiye mu ngengo y’imari waka amafaranga y’amasoko 140, ukora umunani gusa ubwo wari uyakeneye?”

Gasana ati “ Hari ahandi yagiye nyakubahwa Perezida. Hari izindi nshingano zavutse hagati aho.”

Nkusi ati “ Izindi utabwiye Umugenzuzi Mukuru w’imari ya leta , ni ibanga ry’akazi?”

Gasana ati “Hari ibintu bishya bijya biza mu ngengo y’imari bigatuma amafaranga akenerwa kugira ngo ajye gukora icyo gikorwa kandi nta yandi azaboneka vuba.”

Aha Abadepite bahise bavuga ko REB yishe amategeko agenga imikoreshereze y’ingengo y’imari, kuko ngo iba yarabimenyesheje inzego zitanga ayo mafaranga zirimo Minisiteri y’Imari n’Igenamigambi(Minecofin), Inteko Ishinga Amategeko ndetse n’Ikigo cya Leta gishinzwe amasoko (NPPA).

Nkusi ati “Ni yo mpamvu nta kwisobanura no gusaba imbabazi wakabaye ufite uvuga ko yakoreshejwe ibindi. Reka atubwire, ayo mafaranga yakoze iki?”

Gasana ati “Yakoze ibintu byinshi bitandukanye Nyakubahwa Perezida.”

Nkusi ati“ Bitagaragajwe ?"

Gasana ati “Hari ubwo hakundaga kubaho kuziba icyuho kigaragara mu nguzanyo na buruse zahabwaga abanyeshuri kandi nta bundi buryo buhari bwo kubona andi mafaranga, bikaba ngombwa rero ko twirebamo hagati yacu uburyo bikorwa muri ayo mafaranga.”

Abadepite bibajije niba REB igira abashinzwe igenamigambi

Nkusi “ Igituma se mutabihaye umugenzuzi w’imari ya Leta na Minisiteri y’Imari n’Igenamigambi ni iki?”

Depite Munyangaju Théogene ati “ Munadusobanurire, mugira ushinzwe igenamigambi, mukora igenamigambi rifite ukuri? ibyo bindi se byaje ari ibyihutirwa, ni ikiza cyari cyateye, byaturutse hehe?”

Depite Karemera Thierry na we yungamo ati “ Nyakubahwa Perezida aratubwiye ngo hari ibintu byari birimo scholarship .... ibyo bintu turabizi ko bishobora gusabwa ko bikorwa, ariko hari inyandiko ibiherekeza noneho urwego rubifitiye ububasha rugakora inyandiko ibyemeza.”

Nkusi ati “ Hari ibintu umuntu adashobora kumva. Iyo mu masoko 140 umunani gusa ariyo akozwe, hanyuma Umugenzuzi Mukuru w’Imari ya Leta yaza agasanga nta n ‘ibisobanuro biriho. Ese mu nyandiko zigaragaza icungamutungo mwakoze z’umwaka zari zimeze gute, ibyo ntimwari mubizi?”

Abagize PAC bakomeje kumirwa, kugeza ubwo Nkusi agize ati “Ubwo se noneho tuzabwira iki Inteko yadutumye?”

Depite Karemera ati “Buri mwaka uko baje hano bakagira icyo biyemeje umwaka ukurikiyeho uko bagarutse turakomeza tubona bya bibazo na none. Ibyo biyemeza bibamariye iki? Ni ukugira ngo batwikure imbere bagende, tuvuge ngo biyemeje gukora ibingibi , ahubwo nyuma ukabona bigenda birushaho kuba bibi, aho niho harimo ikibazo .....”

Depite Nkusi yongeyeho ati “ Mugomba kutubwira icyo ayo mafaranga yakoze kuko natwe tugomba kubibwira Inteko Rusange. Ni ibiki yakoze? Twebwe tuzajya imbere y’Inteko duceceke ngo byagenze kuriya, yakoze ibindi?”

Gasana ati “Nyakubahwa Perezida ndasaba ko twaboherereza raporo y’uko amafaranga twahawe mu ngengo y’imari yakoreshejwe, tuvuye aha”

Nkusi ati“ Murayitanga ryari?”

Gasana ati “Muraduha igihe nyakubahwa Perezida, ntabwo tujya kuyikora ni ukwegeranya ibyo twakoze.”

Abadepite bagize PAC bemeye kuzahabwa iyo raporo.

Gasana Janvier yahawe inshingano zo kuyobora REB tariki ya 13 Gashyantare 2015, mu gihe mu ngengo y’imari yarimo gutangwaho ibisobanuro ari iyakoreshejwe hagati ya 2014-2015.

Umuyobozi Mukuru wa REB, Gasana Janvier,ahatwa ibibazo n'abagize PAC
Gasana Janvier yemeye amakosa yose yagaragaye mu kigo ayobora anayasabira imbabazi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved