REG yashyizeho uburyo bushya bwo kwishyura ifatabuguzi ry’amashanyarazi

Yanditswe na Philbert Girinema
Kuya 6 Mutarama 2017 saa 10:30
Yasuwe :
0 0

Ikigo cy’Igihugu gishinzwe Ingufu z’Amashanyarazi, REG, cyashyizeho uburyo bushya buzajya bufasha abaturage bahawe amashanyarazi kwishyura amafaranga y’ifatabuguzi ryayo angana n’ibihumbi 56.

Ubusanzwe umuturage wahabwaga amashanyarazi yasabwaga kwishyura amafaranga y’u Rwanda angana n’ibihumbi 56 by’ifatabuguzi, akubiyemo insinga zakoreshejwe, akazi kakozwe n’ibindi.

Mu kiganiro n’abanyamakuru cyabaye ejo kuwa kane tariki 5 Ukuboza 2017, ubuyobozi bwa REG bwatangaje mu gihugu cyose hari abafatabuguzi ibihumbi 600 ariko abari hagati ya 5% na 7% ni ukuvuga ibihumbi hagati ya 30 na 42 bafite mubazi (Cash Power) ariko batabasha kugura umuriro kuko bananiwe kwishyura amafaranga y’ifatabuguzi.

Umuyobozi Mukuru wa Sosiyete itunganya ikanatanga serivisi z’amashanyarazi, EUCL, Jean Claude Kalisa, yavuze ko uku kwezi kuzarangira batangiye uburyo bushya bwo kwishyuza ifatabuguzi ry’amashanyarazi, aho umukiriya azajya agura umuriro agahabwa uwa ½ (kimwe cya kabiri) cy’amafaranga yatwaye ayandi akishyura ifatabuguzi.

Ati “Ubundi abafite ubushobozi buke bemererwaga kwishyura mu byiciro bishyura ibihumbi 15 kugeza barangije. Bitewe n’amikoro y’Abanyarwanda, twabonye ko harimo ikibazo ariyo mpamvu tugiye kubashyira mu buryo bwacu bucuruza umuriro, yajya agura nk’uwa 500 agahabwa uwa 250 andi asigaye akaba ayo kwishyura ifatabuguzi.”

REG yemera ko byateraga igihombo ku mpande zombi kuko leta yatangaga ubushobozi bwo kugira ngo abaturage bacane, ariko kubera ubushobozi bwabo buke ntibashobore kubikoresha.

Kalisa avuga ko ubu buryo bushyashya buzatuma abaturage babyaza umusaruro ibikorwa remezo leta yabegereje.

Ati “Ibi ni ukorohereza abantu bafite mubazi (Cash Power) ariko batabasha kubonera rimwe ibihumbi 15. Buri wese azabasha gukoresha ibyiza leta yamwegereje atazitiwe n’ubushobozi bwe.”

Kuva kuwa 1 Mutarama 2017, abafatabuguzi b’umuriro w’amashanyarazi mu Rwanda batangiye kuwugura ku biciro bishya. Ibi biciro byaragabanyijwe kuri bamwe hagendewe ku ngano y’amashanyarazi bakoresha.

Umuyobozi Mukuru wa Sosiyete itunganya ikanatanga serivisi z’amashanyarazi, EUCL, Jean Claude Kalisa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza