Kwamamaza

REG yasobanuye icyatumye idindiza imihigo ya tumwe mu turere

Yanditswe kuya 14-10-2016 saa 12:04' na Cyprien Niyomwungeri


Uturere dutandukanye twagiye dushyira mu majwi ikigo cy’igihugu gishinzwe ingufu, REG, kuba ku isonga mu byatumye tutabasha kwesa imihigo neza cyane cyane uwo kwegereza no gukwirakwiza amashanyarazi mu baturage mu mwaka w’ingengo y’imari 2015/2016.

Mu kiganiro IGIHE yagiranye n’abayobozi b’Uturere twa Rutsiro, Gakenke, Nyabihu mu kwezi gushize, bahurije ku kuba REG yarabaye intandaro yo kutesa imihigo kwabo kuko nk’aho bari bahize gukwirakwiza amashanyarazi mu baturage bitagezweho bitewe n’uko iki kigo cyababwiye ko Cash Power n’insinga byashize mu bubiko.

Umuyobozi w’Akarere ka Rutsiro Ayinkamiye Emerance yagize ati “Ku birebana n’amashanyarazi ngo habuze Cash power mu bubiko bwa REG.”

Umuyobozi w’Akarere ka Gakenke, Nzamwita Deogratias we yavuze ko ikigo cy’Igihugu gishinzwe ingufu, REG cyakoze 30% by’ibyo cyari cyiyemeje mu gukwirakwiza amashanyarazi mu baturage, impamvu cyatanze ngo cyabuze Cash Power n’insinga.

Hari n’utundi turere tutitwaye neza mu mihigo twagiye dutunga agatoki ikigo REG kuba imwe mu mpamvu yo gusubira inyuma kwatwo, kuko imihigo twari dufatanyije na cyo kitayikoze neza.

Mu kiganiro cyihariye Umuyobozi w’ishami ryo guteza imbere ingufu muri REG (EDCL), Emmanuel Kamanzi, yagiranye na IGIHE yemeye ko kuba uturere tutarageze ku mihigo babigizemo uruhare ariko hari n’abageze ku ntego bakanayirenza.

Yasobanuye ko bahuye n’ibiza batazi icyabiteye bigatuma bakoresha Cash Power zagombaga gukoreshwa mu guha amashanyarazi abakiriya bashya.

Yagize ati “Cash Power zarabuze ariko icyabiteye ntakindi habaye ibiza muri kiriya gihe cy’imvura ishize imihanda iracika, inzu ziratembanwa n’ibikorwa remezo byacu biratembanwa ibitaratembanwe byarangiritse.”

Akomeza asobanura ko umwaka ushize bari bateganyije guha amashanyarazi ingo ibihumbi 50 ariko barengejeho 15% bya Cash Power zari gukenerwa, ariko zigashira bitewe n’uko hari izo abaturage bari basanganywe zahiye ku mpamvu zitazwi bikekwa ko zaturutse ku bihe by’imvura birimo inkuba nyinshi n’imirabyo.

Ati “Izisaga ibihumbi 27 zarahiye bisaba ko zisimbuzwa, abakiriya bandi twagombaga guha amashanyarazi ntabwo twabishoboye kuko izari mu bubiko zarashize. Bitewe n’uko bidakorerwa ino aha igihe cyo kubitumiza no kubizana bitwara hagati y’amezi atatu n’ane; bityo uko gukererwa kwatumye tugira icyo kibazo.”

Uyu mwaka w’ingengo y’imari nibura ingo ibihumbi 80 zizahabwa amashanyarazi hibandwa ku yakomoka ku mirasire y’izuba. Abaturage bari hagati y’ibihumbi 60-75 bahawe amashanyarazi umwaka ushize ariko abashyashya byabaye ikibazo bitewe na Cash Power zabuze.

Ibice byibasiwe n’ibiza cyane ni Uburengerazuba, Amajyepfo n’igice cy’Amajyaruguru.

Emmanuel Kamanzi, Umuyobozi w'Ishami rishinzwe guteza imbere ingufu, EDCL

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved