Kwamamaza

REG yemeje ko mu mezi atatu ibiciro by’amashanyarazi bizavugururwa

Yanditswe kuya 31-10-2016 saa 14:32' na Cyprien Niyomwungeri


Nyuma y’uko inzego zitandukanye zirimo abikorera zigaragaje ko ibiciro by’amashanyarazi mu Rwanda ari imbogamizi ikomeye cyane ku ishoramari, ubuyobozi bw’ikigo cy’igihugu gishinzwe ingufu,REG, bwemeje ko ibyo biciro bigiye kugabanywa hitawe ku bushobozi buke bw’abaturage n’ibyifuzo by’abanyenganda.

Muri Kanama 2015 nibwo Ikigo cy’Igihugu kigenzura imirimo imwe n’imwe ifitiye igihugu akamaro , RURA, cyatangaje ibiciro bishya by’amazi n’amashanyarazi, inganda n’abakiriya bakoresha umuriro mwinshi bakomeza kwishyura Frw 126 kuri Kilowati, abakoresha umuriro uringaniye hongerwaho 35%, ava ku Frw 134 agera ku Frw 182 kuri kilowati.

Ibi bituma u Rwanda ruza imbere muri Afurika y’Iburasirazuba mu kugira ibiciro by’amashanyarazi biri hejuru. Kilowati imwe mu Rwanda igurishwa amasantime 22 mu madolari ya Amerika, ni ukuvuga amafaranga 182, muri Uganda igurishwa amasantime 12, na ho muri Kenya igacuruzwa kuri arindwi.

Mu kiganiro n’abanyamakuru kuri uyu wa Mbere tariki 31 Ukwakira 2016, Umuyobozi mukuru wa REG, Jean Bosco Mugiraneza, yatangaje ko hari ibiganiro barimo kugirana n’ikigo cy’igihugu kigenzura imirimo imwe n’imwe ifitiye igihugu akamaro, RURA, n’abafatanyabikorwa batandukanye kugira ngo ibiciro bigabanywe.

Yavuze ko ibiciro bishya bishobora gutangira kubahirizwa muri Mutarama umwaka utaha, byagenwe hagendewe ku bushobozi bw’abakiriya batandukanye.

Yagize ati “Ibyo biciro bishobora kuzashyirwa mu bikorwa nko mu kwezi kwa Mbere, dukurikije gahunda twihaye. Ibyo biciro bishyashya by’amashanyarazi byitaye ku bafatabuguzi badafite ubushobozi bwo kuyagura n’abakiriya banini barimo inganda.”

Mugiraneza avuga ko ibi biciro bizakurikizwa nyuma yo gutangazwa n’ikigo kibifitiye uburenganzira RURA, bizatuma abakenera ingufu z’amashanyarazi ngo biteze imbere bazibona ku giciro cyiza.

Izi ngamba ziyongera ku zigamije kongera umubare w’abakoresha amashanyarazi ukava kuri 28% ukagera kuri 70% muri 2017 nk’uko gahunda ya Guverinoma ibivuga.

Mugiraneza asobanura ko uriya mubare uziyongera hakoreshejwe uburyo butandukanye burimo no kugabanya amafaranga abakiriya bishyuraga mbere yo kubona ifatabuguzi ry’amashanyarazi.

Ati “Ariya mafaranga tugomba kuyasubiramo akajya atangwa gake gake. Ubundi byabaga ari ibihumbi 56, umuntu yishyura. Turashaka ko bitaba inzitizi cyangwa se imbogamizi kugirango umuntu agire amashanyarazi.”

Iki cyemezo kizatuma imibare y’abagerwaho n’amashanyarazi yiyongera kuko byagaragaye ko hari aho amashanyarazi yageze, abaturage bakaba baturanye na yo ariko batayafite mu ngo zabo.

Hari n’ingamba zo kongera umubare w’abakoresha amashanyarazi aturuka ku mirasire y’izuba, nibura ingo zigera kuri 22% zikaba ziyafite muri 2018. Ni mu gihe ubu aya mashanyarazi ari mu ngo zingana n’ibihumbi 47, amashuri 260 amavuriro 163, ni ukuvuga hafi 3%.

Jean Bosco Mugiraneza, Umuyobozi Mukuru wa REG

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved