REMA igiye gukora igenzura ireba inganda zisohora imyuka yangiza ikirere

Yanditswe na IGIHE
Kuya 2 Kamena 2019 saa 06:29
Yasuwe :
0 0

Ikigo cy’Igihugu gishinzwe ibidukikije (REMA) cyatangaje ko kigiye gukora igenzura mu nganda, izizagaragaraho gusohora imyuka yangiza ikirere zigafungwa.

Iki kigo cyatangaje ko kigiye gukora isuzuma mu gihe hitegurwa umunsi mpuzamahanga wahariwe ibidukikije wizihizwa tariki 5 Kamena.

The New Times dukesha iyi nkuru yatangaje ko iryo genzura rizakorwa tariki 3 kugeza kuri 4 Kamena mu nganda ziri mu mujyi wa Kigali, Bugesera na Rwamagana.

Hashize igihe hirya no hino mu gihugu hagaragara zimwe mu nganda zangiza ibidukikije ndetse zimwe muri zo zagiye zifungwa.

Umwaka ushize uruganda Kigali Leather Factory rwahagaritswe igihe gito nyuma yo gusanga rusohora imyanda yangiza uruzi rw’Akagera.

Umwaka ushize kandi amazi mabi amenwa mu mugezi wa Mukungwa yatumye amafi yari muri uwo mugezi apfa mu buryo butunguranye.

Umuyobozi Mukuru wa REMA, Eng Colette Ruhamya yavuze ko mu igenzura bazakora bazibanda ku nganda zikekwaho gusohora imyuka yangiza ikirere ndetse n’izagiye zigaragaraza mu bihe byashize kutubahiriza amabwiriza yo kurengera ibidukikije.

Inyigo iherutse gukorwa mu Rwanda yagaragaje ko imyuka yangiza ikirere cyane cyane ituruka mu bikorwa by’ubwubatsi no mu nganda.

Ruhamya yagize ati “Turasaba abashoramari mu by’inganda kumenya ko mbere yo gushinga uruganda, bagomba kubanza kubahiriza ibisabwa mu kurengera ibidukikije. Hari ikoranabuhanga ryabugenewe, bakwiriye kurigura bakarikoresha.”

Yavuze ko benshi banga gukoresha ubwo buryo bwo kurengera ibidukikije kuko baba bashaka inyungu zihuse nyamara avuga ko ushaka gukora ibirambye abanza kwita ku bidukikije.

Imibare igaragaza ko guhera mu 2013 ubwo inganda zahamagarirwaga gukoresha ikoranabuhanga ritangiza ibidukikije, byagabanyije ikiguzi zakoreshaga kandi bigatuma zizigama asaga miliyoni ebyiri z’amadolari.

Hagaragazwa ko kandi gukoresha ingufu zidahumanya ikirere bigabanya ingano y’ingufu uruganda rwakoreshaga , bikagabanya n’imyuka yangiza ikirere ho toni zisaga miliyoni zirindwi z’umwuka mubi wa CO2 buri mwaka.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza