Kwamamaza

RGB ishobora kongererwa ubushobozi abayiyobora bakagenerwa manda y’imyaka itanu

Yanditswe kuya 15-11-2016 saa 13:04' na Cyprien Niyomwungeri


Ikigo cy’Igihugu cy’Imiyoborere RGB, cyasabiwe kwigenga kikongererwa n’ubushobozi burimo gusaba raporo y’imitangire ya serivisi mu nzego zitandukanye z’ubuzima bw’igihugu, ndetse n’abayobozi bacyo bakagenerwa manda irahirirwa imbere ya Perezida wa Repubulika.

RGB ishobora kongererwa ubushobozi igahinduka urwego rufite ubuyobozi bukuru n’ubunyamabanga bukuru, nkuko Inteko Ishinga Amategeko, Umutwe w’Abadepite yaraye yemeje Umushinga w’Itegeko rishyiraho urwo rwego.

Mu mwaka wa 2010 nibwo hagiyeho RGB ishinzwe kwimakaza imiyoborere myiza mu nzego z’ubuzima bw’igihugu. Iri tegeko rikazatuma RGB yigenga, ntibogamire ku rundi rwego runaka mu nshingano zarwo za buri munsi.

Bisobanuye ko ruzava mu mutaka wa Minisiteri y’ubutegetsi bw’Igihugu.

Mu gusobanura impamvu y’uyu mushinga w’itegeko rishyiraho urwego rw’igihugu rw’imiyoborere, Minisitiri w’Ubutegetsi bw’Igihugu, Francis Kaboneka, yabwiye abadepite ko izi mpinduka ari mu rwego rwo kuvugurura imiyoborere myiza.

Yagize ati “Nkuko mubizi igihugu cyacu gihora kivugurura imikorere y’inzego z’igihugu mu rwego rwo kwimakaza umuco w’imiyoborere myiza.”

Yakomeje asobanura ko izi mpinduka zigamije kugira ngo RGB ikomeje gukora ubushakashatsi butandukanye cyane cyane ku miyoborere, ku buryo abanyarwanda bishakamo ibisubizo mu buryo bw’imiyoborere, kwegereza ubuyobozi abaturage, mu rwego rwo gutanga serivisi nziza n’ibindi.

Ati “Guverinoma yasanze byaba byiza gihawe ubwigenge kikagira ubushobozi, ububasha n’icyizere cy’ubushakashatsi bwakozwe kugira ngo bwumvikane ko bwakozwe n’ikigo cyigenga, gifite ubwisanzure, kidafite urundi rwego rukireberera.”

Zimwe mu nshingano nshyashya za RGB ivuguruye

Ubundi RGB yari ifite inzego z’ubuyobozi zirimo ubuyobozi bukuru gusa, bizahinduka igire ubuyobozi bukuru n’ubunyamabanga bukuru. Iki kigo cyakurikiranaga imiryango itegamiye kuri leta ariko imiryango mvamahanga yabarizwaga ahandi ikaba ari naho yiyandikisha, ubu iyo miryango yose yaba kuyandika no kuyikurikirana bizajya muri RGB.

Ubusanzwe ikigo gishinzwe abinjira n’abasohoka nicyo cyandikaga kikanakurikirana imiryango itegamiye kuri leta mvamahanga.

Ubuyobozi bw’uru rwego rwa RGB buzagira manda y’imyaka itanu ishobora kongerwa ndetse umuyobozi warwo akaba yarahirira imbere y’Umukuru w’igihugu.

RGB izagumana inshingano zayo ariko ziyongereho izo gukurikirana inyigo zikorerwa mu Rwanda ku miyoborere n’uburyo bwo kwishakamo ibisubizo, gusigasira no guteza imbere uburyo bw’umwimerere bwo kwishakamo ibisubizo.

Uru rwego ruzaba rufite ububasha bwo gusaba raporo y’imitangire ya serivisi mu nzego zitandukanye z’ubuzima bw’igihugu, zaba iz’ibanze cyangwa izo ku rwego rw’igihugu. Ruzajya rutanga raporo yarwo ku Nteko Ishinga Amategeko imitwe yombi no kwa Perezida wa Repubulika.

Abadepite banyuzwe n’izi mpinduka

Abadepite bashimye ko uru rwego ruzajya rukora ubushakashatsi bugafasha mu ishyirwa mu bikorwa rya gahunda zigamije kwishakamo ibisubizo.

Depite Mporanyi Theobald yagize ati “Guha RGB ubuzima gatozi ikigenga ni uguhesha igihugu cyacu icyizere mu byo dukora, kuko ari urwego rushobora gusobanura imiyoborere y’u Rwanda ikaba iri no ku rwego rwo guhangana n’abatavuga rumwe natwe, kuko bazaba ari urwego rugaragara rushobora gutanga ibihamya bifatika ku ngingo runaka.”

Yakomeje avuga ko kuba uru rwego ruzajya rugenzura imitangire ya serivisi, bizatuma guhana abatubahiriza inshingano zabo nk’abayobozi byoroha kuko bazajya bashingira ku bimenyetso bifatika.

Inyubako Ikigo cy'Igihugu gishinzwe imiyobirere, RGB, gikoreramo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved