RIB yasobanuye impamvu hari abayobozi bafatwa bakekwaho ruswa bakarekurwa bidateye kabiri

Yanditswe na Emma-Marie Umurerwa
Kuya 9 Gicurasi 2019 saa 08:19
Yasuwe :
0 0

Hari bamwe mu bayobozi mu nzego zitandukanye z’Igihugu, bacyekwaho ibyaha bya ruswa cyangwa kunyereza umutungo wa Leta n’ibindi bagatabwa muri yombi bidateye kabiri bakagirwa abere bigatera urujijo. Abayobozi ba bimwe mu Bigo bya Leta, abayobozi bakuru muri za Minisiteri n’abandi bo mu nzego zitandukanye hari igihe bakurikiranwaho ibyaha bitandukanye birimo na ruswa, RIB ikabakoraho iperereza ndetse bagatabwa muri yombi bagashyikirizwa ubushinjacyaha. Abantu batandukanye baganiriye na (...)

Hari bamwe mu bayobozi mu nzego zitandukanye z’Igihugu, bacyekwaho ibyaha bya ruswa cyangwa kunyereza umutungo wa Leta n’ibindi bagatabwa muri yombi bidateye kabiri bakagirwa abere bigatera urujijo.

Abayobozi ba bimwe mu Bigo bya Leta, abayobozi bakuru muri za Minisiteri n’abandi bo mu nzego zitandukanye hari igihe bakurikiranwaho ibyaha bitandukanye birimo na ruswa, RIB ikabakoraho iperereza ndetse bagatabwa muri yombi bagashyikirizwa ubushinjacyaha.

Abantu batandukanye baganiriye na IGIHE bagaragaje impungenge ku itabwa muri yombi ry’abo bakunze kwita “ibifi binini.” Ngo kuko batamara kabiri batagizwe abere.

Ibitekerezo by’abo twaganiriye twabikusanyije twifashishije imbuga nkoranyambaga nka Whatsapp, Viber na Twitter.

Umwe mu batanze igitekerezo witwa Dusabumuremye Amiel yagize ati “RIB izatubwire niba ibimenyetso iba ifite ijya guta muri yombi ibifi binini biba bihagije, kuko dusigaye tubona bahita bagirwa abere.”

Kabatesi Jeanne na we yagize ati “Wasobanura gute ukuntu RIB ikora iperereza agasanga umuyobozi runaka yarigishije miliyoni magana cyangwa yariye ruswa y’amamiliyoni menshi agatabwa muri yombi, bwacya ngo nta cyaha kimuhama kandi yareretswe itangazamakuru?.”

Kabatesi yakomeje agira ati “Abaturage baciriritse ibyaha birabahama, ariko kugirango uzabone aho umuyobozi yahamwe n’icyaha ntibikunze kubaho.”

Mu kiganiro aherutse kugirana n’Itangazamakuru, Umuyobozi mukuru wa RIB, Col. Ruhunga Jeannot, yavuze ko hari igihe abo bayobozi barekurwa by’agateganyo bagakurikiranwa badafunze, abaturage bakagira ngo bagizwe abere.

Ati “Ubugenzacyaha burabanza bugakora dosiye umuntu agakurikiranwa afunze cyangwa adafunze. Ashobora kugera ku mucamanza impamvu zo kumufunga zavuyeho cyangwa se akabona arekuwe atatoroka, agafata icyemezo cyo kumufunga cyangwa kumufunga by’agateganyo. Akenshi rero abaturage ntibamenya niba umuntu yafunguwe by’agateganyo cyangwa yatsinze.”

Col Ruhunga yavuze ko “Hari abaturage bacyeka ko RIB iba yamuhohoteye cyangwa umucamanza aba yariye ruswa akamugira umwere, ariko ahanini hari igihe akomeza gukurikiranwa adafunze.”

Ubusanzwe amategeko avuga ko ihame ari uko umuntu wese aburana ari hanze kereka iyo hari impamvu zikomeye zituma aburanye ari hanze ashobora gucika cyangwa agasibanganya ibimenyetso.

Ingingo ya 89 y’Itegeko ryerekeye imiburanishirize y’imanza nshinjabyaha ivuga ko ukurikiranyweho icyaha ari ihame ko akurikiranwa adafunze.

Ingingo ya 96 ivuga ko ukurikiranyweho icyaha adashobora gufungwa mbere y’urubanza keretse hari impamvu zikomeye zituma akekwaho icyaha kandi icyo akurikiranyweho kikaba ari icyaha amategeko yateganyirije guhanisha igifungo cy’imyaka ibiri nibura.

Na ho iya 97 ivuga ko impamvu zikomeye zituma umuntu akekwaho icyaha atari ibimenyetso ahubwo ari ibyagezweho bihagije mu iperereza bituma bakeka ko umuntu ukurikiranywe ashobora kuba yarakoze icyaha.

Umunyamabanga Mukuru w'Urwego rw'Igihugu rushinzwe ubugenzacyaha Col Ruhunga Jeannot yavuze ko hari igihe abo bayobozi barekurwa by’agateganyo bagakurikiranwa badafunze, abaturage bakagira ngo bagizwe abere

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza