Kwamamaza

RSB yahagurukiye abenga inzoga bavangamo igikamba, amatafari na omo

Yanditswe kuya 17-10-2016 saa 15:26' na Emma-Marie Umurerwa


Ikigo cy’Igihugu gitsura ubuziranenge (Rwanda Standards Board, RSB), kivuga ko cyahagurukiye abantu benga inzoga zitujuje ibisabwa bagashyiramo ibintu bishobora kwangiza ubuzima bw’abazinyoye.

Hari abantu ku giti cyabo bagiye bafatwa benga bakanacuruza inzoga bashyizemo ibintu bitandukanye bishobora kugira ingaruka ku buzima bw’umuntu.

Bimwe mu bitungwa agatoki ko bishyirwa mu nzoga z’inkorano, ni ifu y’amatafari ahiye (ituma inzoga y’urwagwa ugira ibara ritukura) isabune ya Omo (bivugwa ko ituma inzoga igira ifuro) n’itabi ry’igikamba (rituma inzoga igira ubukana).

Zimwe mu nzoga zishyirwa mu majwi ku kuba zengwa muri ubwo buryo, harimo izitwa imbutabuta, umumanurajipo, yewe muntu, n’izindi.

Umuyobozi w’agateganyo w’Ikigo cy’Igihugu gishinzwe ubuzirange, Murenzi Raymond, yatangarije IGIHE ko ikibazo cy’inzoga z’inkorano zitujuje ubuziranenge bakizi ndetse ko bamwe mu babikora batangiye gutabwa muri yombi.

Yagize ati "Ibyo byose bashyiramo turabizi kandi hari abagiye bafatwa benga inzoga zitujuje ubuziranenge. Abenshi ni abantu bazengera mu gikari ku buryo utavuga ngo ni uruganda rwafashwe rushyira amatafari cyangwa ibikamba mu nzoga."

Akomeza avuga ko bari gufasha abenga inzoga kugira ngo benge izujuje ubuziranenge, hakurikijwe amabwiriza aba yarashyizweho n’iki kigo.

Ati "Ubu turimo kugerageza gufasha abakora izo nzoga hirya no hino mu gihugu, ndetse ubu twamaze gushyiraho amabwiriza y’ubuziranenge duteza imbere inzoga z’umwimerere mu Rwanda, harimo urwagwa n’izindi."

Uyu muyobozi yakomeje avuga ko bamaze gutanga ibirango by’ubuziranenge ku nganda ebyiri zenga inzoga mu Rwanda, kandi ko ababihawe izo benga ari nta makemwa.

Ati "Nta mananiza ari mu gutanga icyangombwa kuko ntiwaha ibyangombwa umuntu ukorera mu gikari iwe aho abana bakinira, hariho n’ibindi bijyanye na tekiniki (technique) bisuzumwa mbere yo gutanga ibyangombwa. Abantu rero bakora ubushabitsi (business) bwo kwenga inzoga batwegere tubafashe."

Murenzi yakomoje no ku kibazo cy’umwanda mu maresitora n’amahoteli (hotel) avuga ko abakora ubucuruzi bw’ibiribwa ndetse n’ibinyombwa bakwiye kwitwararika, barushaho kubahiriza amabwiriza y’ubuziranenge.

Umuyobozi w’Inama y’Ubutegetsi ya RSB,Dr Emile Bienvenue, avuga ko muri rusange abanyarwanda bamaze gusobanukirwa n’akamaro ko kubahiriza amabwiriza y’ubuziranenge ugereranyije no mu mwaka wa 2002 ubwo iki kigo cyashingwaga.

Murenzi avuga ko abenga inzoga zitujuje ubuziranenge batangiye gutabwa muri yombi

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved