Rubavu: Ababyeyi bataye inshingano bituma abana basaga 280 bagira ikibazo cy’imirire mibi

Yanditswe na Emma-Marie Umurerwa
Kuya 4 Kamena 2019 saa 01:45
Yasuwe :
0 0

Mu Karere ka Rubavu hari abana basaga 280 bafite ikibazo cy’imirire mibi muri bo abagera kuri 49 bari mu ibara ry’umutuku.

Ubuyobozi bw’Akarere ka Rubavu buvuga ko iki kibazo giterwa nuko ababyeyi bataye inshingano, aho usanga bamwe bakora ubucuruzi bwambukiranya imipaka ntibibuke gutegurira abana babo indyo yuzuye.

Byagarutsweho n’Umuyobozi w’Akarere ka Rubavu wungirije ushizwe imibereho myiza y’abaturage, Uwampayizina Marie Grace.

Ati "Usanga hari ababyeyi babyuka mu gitondo bajya gukora imirimo itandukanye, abandi bakajya gucuruza muri Congo ntibite ku bana babo. "

"Mu bihe byashize hari n’ababyeyi wasangaga basize abana bato ku mupaka wa ‘Petite barrière’ abana bakabasigira abandi bana nta n’ikintu cyo kurya babasigiye. Ubu burangare rero nibwo butera ikibazo cy’imirire mibi mu bana."

Mu rwego rwo guhangana n’iki kibazo, uyu muyobozi avuga ko hafashwe ingamba zitandukanye zirimo gushishikariza ababyeyi kwitabira igikoni cy’umudugudu, guteka agakono k’umwana by’umwihariko abatangiye guhabwa imfashabere.

Mu zindi gahunda harimo ubukangurambaga bwiswe "Hehe n’imirire mibi" bwateguwe n’akarere hamwe n’ubwiswe "Tumurere neza" bwateguwe n’Intara y’Iburengerazuba. Izi gahunda zose zikaba zigamije kurwanya imirire mibi.

Ababyeyi nabo ntibabusanya n’ibivugwa n’ubuyobozi. Dukuzimana Abertine, ni umubyeyi umwe mu babyeyi basigaga abana ku mupaka akajya gucuruza i Goma.

Ati "Umwana wanjye yarwaye bwaki kubera ubujiji n’uburangare kuko nyuma yo gusobanurirwa ibigize indyo yuzuye nasanze ibyinshi mbifite."

Abagore basigaga abana ku mupaka bakajya gucuruza, imyumvire yabo itangiye guhinduka kuko basigaye basiga abana mu bigo Mbonezamikurire y’abana bato no mu marerero kandi na bo bakigishwa uko bategura indyo yuzuye.

Umuhuzabikorwa w’urugo mbonezamikurire rwa Majengo, Sheihk Ngiruwonsanga Saidi, avuga ko uru rugo rufite abana bari hagati y’imyaka itatu n’itandatu bagera ku 189 bakaba babaha uburere buboneye bakanigisha ababyeyi babo uko babitaho.

Imibare y’ikigo cy’igihugu cy’ibarurishamibare ya 2015 igaragaza ko Akarere ka Rubavu, gafite abana bagwingiye 46% mu gihe ku rwego rw’igihugu byari 38%.

Mu guhangana n’iki kibazo mu Rwanda hari amarerero asaga 4 200, mu gihe mu Karere ka Rubavu hari amarerero 164, arererwamo abana basaga ibihumbi 13 500.

Abana basaga 280 bafite ikibazo cy’imirire mibi mu Karere ka Rubavu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza