Kwamamaza

Rubavu:Abafite ubumuga bwo kutabona barasaba ko mituweli yakwishingira inkoni bitwaza

Yanditswe kuya 15-10-2016 saa 11:11' na Mukwaya Olivier


Abafite ubumuga bwo kutabona bo mu karere ka Rubavu barasaba ko inkoni yera bifashisha yashyirwa mu byo ubwisungane mu kwivuza bwishingira kugira ngo na bo boroherezwe kuyibona kuko kugeza ubu kuyigurira bidashoborwa na benshi.

Ibi babisabye kuri uyu wa 14 Ukwakira 2016, mu birori byo kwizihiza Umunsi Mpuzamahanga w’inkoni yera aho ku rwego rw’igihugu byizihirijwe mu karere ka Rubavu.

Usibye kuba abafite ubumuga bwo kutabona bagorwa no kubona aho bagurira iyi nkoni kuko zitaba ku masoko yo mu Rwanda, banagaragaza ko kugeza ubu igiciro cyayo kiri hagati y’ibihumbi 25 na 30 by’amafaranga y’u Rwanda [ku icirirtse] gihanitse, bakifuza ko ubwisungane mu kwivuza na bo bwabagoboka.

Perezida w’Inama y’Igihugu y’Abafite ubumuga, Niyomugabo Romalis, avuga ko nubwo hari byinshi bashimira imiyoborere myiza birimo kuba uyu munsi byinshi mu bikoresho byifashishwa n’abafite ubumuga bitumizwa hanze byarakuriweho imisoro, hari byinshi bigikeneye gukorwa birimo nko gushyira inkoni yera mu byishyurwa n’ubwisungane mu kwivuza.

Umunyamabanga Nshingwabikorwa w’Ubumwe Nyarwanda bw’Abafite ubumuga, Dr Kanimba Donathille yagize ati ’’Iyaba byashobokaga ko inkoni yera ishyirwa kuri mituweli bityo abatabona na bo bakajya bishyura 10% by’ikiguzi cyayo nk’uko bigenda ku miti. Icyo twamenyereye mu Rwanda ni uko iyo ryavuzwe ritaha ni yo mpamvu twizeye ko ibi na byo bizashoboka.’’

Guverineri w’Intara y’Uburengerazuba, Alphonse Munyantwari, yemeza ko hari byinshi bimaze gukorwa mu kwita ku bafite ubumuga bwo kutabona harimo nko kuba hari inzego zitandukanye zibahagarariye, anagaragaza ko binyuze mu buvugizi n’ibindi bizagenda bigerwaho.

Yagize ati ’’Mu cyerekezo cya Guverinoma y’u Rwanda harimo kureba ko nta munyarwanda n’umwe usigara inyuma, ni yo mpamvu Leta yafashije abafite ubumuga gushyiraho inzego zabo bwite. Ibi byifuzo rero bagaragaje ntekereza ko atari byo byananirana.’’

Yemeza ko binyuze mu mikoranire y’inzego zitandukanye hazakomeza kuganirwa no buryo igenamigambi ryarushaho kunozwa kugira ngo abafite ubumuga bwo kutabona bakomeze kwitabwaho.

Abafite ubumuga bwo kutabona bahora basaba kwegerezwa ibikoresho bifashisha mu buzima bwabo bwa buri munsi ndetse bigashyirwa no ku rutonde rw’ibishobora kwishingirwa n’ubwisungane mu kwivuza.

Inkoni yera yavumbuwe mu 1921 na James Biggs, Umwongereza w’umuhanga mu gufotora, wari umaze gupfa amaso nyuma y’impanuka, ashaka uburyo yajya agaragarira abakoresha ibinyabiziga mu muhanda.

Ahagana mu 1964, Umuryango w’Abibumbye wemeje iyi nkoni nk’igikoresho gifasha abatabona mu buzima bwabo bwa buri munsi.

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved