Rubavu:Abahinzi b’ibirayi barabunza imitima nyuma y’aho igiciro cyabyo kiguye bikabije

Yanditswe na Kanamugire Emmanuel
Kuya 11 Mutarama 2017 saa 11:34
Yasuwe :
0 0

Nyuma y’aho umusaruro w’ibirayi ubaye mwinshi mu Karere ka Rubavu, bigatuma igiciro cyabyo kiva ku mafaranga 300 kikaba kigeze ku 130, abahinzi bararira ayo kwarika bavuga ko nta cyizere bafite cyo kuzabona ayo bashoye.

Muri Kanama na Nzeri 2016, ni bwo umusaruro watangiye kuzamuka, ikiro cy’ibirayi kiramanuka kigera ku mafaranga 160, kivuye kuri 300.

Kugira ngo gikomeze kumanuka ku buryo kigeze ku 130 ubu, ngo byatewe n’uko abahinzi babyirayemo mu minsi mikuru basarura ari benshi bituma bigwira ku isoko.

Hagenimana Epimaque umwe mu bahinzi bo mu murenge wa Bugeshi avuga ko aho yakuraga toni ebyiri z’ibirayi ubu byeze akaba yarahakuye toni eshanu,none yabiburiye isoko.

Yagize ati ”Twagize umwero mwinshi ariko abakiliya babaye bake,dufite ikibazo cy’aho twakwerekeza umusaruro.”

Umunyamabanga Nshingwabikorwa w’umurenge wa Bugeshi, Mvano Nsabimana Etienne yavuze ko hafashwe icyemezo cyo kubuza abahinzi gusarura mu kajagari kugira ngo hirindwe ko ibirayi bijya ku isoko ari byinshi kuko ari bwo bibura abaguzi.

Ati “Twafashe uyu mwanzuro uzajya ukurikizwa kuri buri mwero, kuko iyo ibirayi bibaye byinshi kubibonera amasoko biragorana, bigatangira kuboreraho ku bahinzi.”

Bamwe mu bahinzi bakirije yombi uyu mwanzuro bakaba bahamya ko uzabahoza amarira.

Nzabonimpa Theoneste ati ”Izi ngamba zizadufasha cyane, ubu twakuye turi benshi none twabuze isoko, amarira ni yose kuko uko bimara igihe hanze ni ko bigenda bita ibiro, bishobora no kubora umunota ku wundi. Ahantu hari amakusanyirizo hose nta kiri kugenda;birarunze abandi bakuye bari kwirirwa bashyizeho abarinzi, urumva ni amafaranga tutari twateganyije.”

Biteganyijwe ko mu gihe umuhinzi akeneye amafaranga azajya ajya ku ikusanyirizo bagirane amasezerano bamuhe amafaranga noneho bikurwe ku gihe, aho kubikura mu kajagari.

Igihingwa cy’ibirayi, uretse kuba ari cyo kiza mu by’ibanze biribwa n’abaturage batuye umurenge wa Bugeshi kibinjiriza amafaranga atubutse bakiteza imbere.

Uyu murenge wa Bugeshi ndetse n’indi iwuturiye mu karere ka Rubavu, ni tumwe mu duce dufatwa nk’ikigega cy’igihingwa cy’ibirayi kubera imiterere y’aka gace gaturiye ibirunga usanga kera cyane.

Nyuma y'aho umusaruro w'ibirayi wiyongereye abahinzi bahangayikishijwe n'uko igiciro cyabyo cyamanutse bikabije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza