Kwamamaza

Rubavu: Abaturage barishimira igabanuka ry’igiciro cy’ibirayi

Yanditswe kuya 26-11-2016 saa 09:48' na Mukwaya Olivier


Abaturage bo mu Karere ka Rubavu barishimira ko umusaruro w’ibirayi wiyongereye ndetse n’igiciro cyabyo cyari kimaze iminsi cyarazamutse kikagabanuka kikagera ku mafaranga 200 kivuye kuri 400 mu mezi make ashize.

Ibirayi nka kimwe mu bihingwa biramira benshi mu batuye muri aka Karere ndetse no mu bindi bice by’igihugu, byatangiye kuzamuka muri Nyakanga uyu mwaka ndetse bitangira kuba ingume ku babicuruza n’ababigura.

Muri Kanama uyu mwaka, ubwo ikiro cy’ibirayi cyari kigeze ku mafaranga y’u Rwanda ari hagati ya 280 na 300, icyo gihe bamwe batangaje ko bashobora kubizinukwa burundu.

Nyuma y’amezi ane, igiciro cyarazamutse, ubu ikiro cy’ibirayi cyongeye kumanuka kigera ku 190 ku ikusanyirizo, na 200 ku isoko kivuye ku mafaranga 400 y’u Rwanda.

Nyiraguhirwa Marie Rose umwe mu bahinzi b’ibirayi mu Murenge wa Mudende yemeza ko nta kwezi kurashira bavuga ko bakomerewe no kwigondera ikiribwa cyabo cy’ibanze cy’ibirayi, bitewe n’uko igiciro cyabyo cyari gihanitse ndetse bikanatuma no mu bindi bice by’igihugu bakibura.

Ati “Ibirayi byabonetse twari twarabyibagiwe none byagiye kwera byerera rimwe kandi igiciro biriho kibereye buri wese tunafite icyizere ko gikomeza kumanuka amakusanyirizo arimo kutugurira neza nta kibazo.”

We na bagenzi be bahamya ko umwero w’ibirayi wabateye akanyamuneza bitewe n’uko batangiye kugurisha kandi bakaba bejeje ku bwinshi.

Aba bahinzi bavuga kandi ko mu bihe byahise hari byinshi byabangirizaga umusaruro bigatuma badatera imbere nk’uko bikwiye birimo abamamyi no kubura amafumbire yabugenewe.

Ubuyobozi bw’Akarere ka Rubavu bwemeza ko abaturage bari batangiye kwiheba bitewe n’imvura yagiye igwa mu buryo budasanzwe mu bice byeramo ibirayi ndetse n’igihe cy’izuba kigeze kugaragara mu ihinga ariko bakizeza ko umuturage ubu yatangiye kweza.

Umuyobozi w’Akarere ka Rubavu Wungirije ushinzwe Imari n’Iterambere ry’Ubukungu, Murenzi Janvier avuga ko ingamba zafashwe na Minisiteri y’Ubuhinzi n’Ubworozi zo kubumbira hamwe abahinzi kimwe no kwirukana abamamyi ari zimwe mu ngufu zakoreshejwe zanatumye umuhinzi agira ijambo ku musaruro.

Yagize ati “Mbere hari abamamyi biyitiriraga umusaruro bakigira abaranga bawo ugasanga bararya kurusha uwahinze abo bavuyeho. Kuba abahinzi barabumbiwe hamwe hakanashyirwaho amakusanyirizo, ubu bimeze neza kuko umuhinzi abona agaciro ke . Ikibazo kiracyari ku buryo bwo gukorana n’Inkeragutabara zitanga inyongeramusaruro hifashishijwe ubuso, abantu ntibarabyumva neza ariko bizakemuka.’’

Rubavu iri mu turere tweramo ibirayi byinshi ndetse kagemurira ibindi bice by’igihugu umusaruro wabyo.

Ubuyobozi bw'Akarere ka Rubavu batangaza ko bafite icyizere ko igiciro cy'ibirayi kizakomeza kumanuka
Ibirayi byongeye kuboneka ku bwinshi mu Karere ka Rubavu

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved