Rubavu: Abayisilamukazi bahawe umukoro ku kurwanya igwingira ry’abana

Yanditswe na Mukwaya Olivier
Kuya 28 Mata 2019 saa 03:13
Yasuwe :
0 0

Abayisilamukazi bahoze bakora ubucuruzi bwambukiranya umupaka mu buryo butemewe [bazwi nk’abacoracora] nyuma yo kwihuriza hamwe bagashinga umuryango wo kwiteza imbere basabwe umusanzu mu kurwanya imirire mibi n’igwingira ry’abana.

Ni ubutumwa bahawe ku wa 27 Mata 2019 nyuma y’umuganda usoza ukwezi bakoreye mu Murenge wa Nyundo mu Karere ka Rubavu.

Uturere 13 nitwo twugarijwe n’imirire mibi mu Rwanda aho igwingira ry’abana riri kuri 38%. Twiganjemo utwo mu Burengerazuba nka Ngororero, Karongi, Rubavu, Rutsiro, Rusizi na Nyabihu [iri ku kigereranyo cya 59%].

Umuyobozi Mukuru muri Minisiteri y’Ubutegetsi bw’Igihugu ushinzwe Amajyambere rusange n’Imibereho myiza y’Abaturage, Sheikh Hassan Bahame, yasabye aba bagore gutanga imbaraga zabo mu kurwanya igwingira.

Yagize ati “Mwagaragaje ko mufite gahunda yo kurwanya igwingira mu Burengerazuba nk’intara iri hejuru mu kugira umubare w’abana bagwingiye. Nimuhaguruka mugafata umwanya mukegera abaturage bizashira.’’

Yijeje ubufasha mu guhangana n’ikibazo cy’imirire mibi binyuze mu ngengo y’imari ingana na miliyoni 95 Frw zagenewe guhangana n’iki kibazo.

Yavuze ko “Turashaka kubaka akarere gasa nkuko mukeye; abagore bose bakaba nkamwe, bagateka nkuko muteka, nta mwana wagwingira mu karere. Muzasabe akarere mugende mutekere abana mu midugudu na ba nyina babonereho, muzaba mufashije igihugu.’’

Akarere ka Rubavu gafite imiryango 13 442 iri mu bukene bukabije ari na yo yasabiwe umwihariko kuko isanzwe ifitiwe gahunda n’akarere.

Umuyobozi w’Akarere wungirijre Ushinzwe Iterambere ry’Ubukungu, Murenzi Janvier, yavuze ko hakenewe impinduka zifatika mu gufasha imiryango ikennye bikabije.

Ati “Intego bihaye zijyanye n’icyerecyezo akarere gafite mu kurwanya igwingira n’imirire mibi na gahunda yo kwimakaza isuku. Turifuza ko badufasha mu gikorwa cya ‘Parrainage’ aho abagore bateye imbere bafasha iyi miryango, bakayitaho, bakanayikurikirana.’’

Ayinkamiye Umulisa Amina yavuze ko gufashanya bisanzwe muri gahunda y’Idini ya Islam ari na yo mpamvu bishyize hamwe ngo barwanye igwingira no kwimakaza isuku.

Yagize ati “Twishyize hamwe kuko twarebaga ukuntu hari abana bagwingiye muri twe, bidutera kugira icyo twakora dufasha igihugu n’abana b’u Rwanda.’’

Umuyobozi w’abagore bibumbiye mu Muryango wa OFF-Wisigara, Kantengwa Henriette, yavuze ko bazashyira imbaraga mu kurwanya igwingira.

Ati “Kurwanya igwingira ntibyoroshye, muri gahunda yacu ntabwo ari ibintu bizatuvuna cyane uretse ko tutabikorera rimwe kuko umubare w’abatishoboye n’abafite ubukene bukabije muri Rubavu ni munini.’’

Nyuma y’umuganda, abayisilamukazi banishyuriye ubwisungane mu kwivuza ku miryango 208 itishoboye.

Yavuze ko bazakomeza kwishakamo ibisubizo byo guhangana n’igwingira ry’abana.

Ubushakashatsi mu rwego rw’ubuzima bw’abaturage DHS, bwakozwe hagati ya 2005 na 2015 bwagaragaje ikibazo cyo kugwingira mu bana bari munsi y’imyaka itanu kigenda kigabanuka ku muvuduko wa 6% mu myaka itanu cyangwa 1,3 % buri mwaka, kuko kugwingira byari bigeze kuri 38% bivuye kuri 51% yo mu 2005.

Uturere turi hejuru ya 40% turimo Nyabihu, Rubavu, Ngororero, Karongi, Rutsiro, Nyamagabe, Nyaruguru na Huye, Burera na Gakenke na Kayonza.

Abayisilamukazi bahoze mu bucuruzi bwambukiranya imipaka butemewe babanje gukora umuganda n'abaturage bo mu Murenge wa Nyundo
Umuyobozi Mukuru muri Minisiteri y’Ubutegetsi bw’Igihugu ushinzwe Amajyambere rusange n’Imibereho myiza y’Abaturage, Sheikh Hassan Bahame, yasabye abayisilamukazi umusanzu mu kurwanya igwingira ry'abana
Uyu muhango witabiriwe n'abantu batandukanye
Umuyobozi w’Akarere wungirijre Ushinzwe Iterambere ry’Ubukungu, Murenzi Janvier, yavuze ko hakenewe impinduka zifatika mu gufasha imiryango 13 442 kuva mu bukene bukabije
Abagabo bari bashyigikiye abagore babo muri iki gikorwa
Nyuma y'iki gikorwa, abayisilamukazi bahoze mu bucuruzi butemewe bafashe ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza