Rubavu: Abayobozi na sosiyete z’isuku ntibavuga rumwe ku mwanda wugarije umujyi

Yanditswe na Mukwaya olivier
Kuya 30 Ukuboza 2017 saa 09:18
Yasuwe :
0 0

Utembereye mu Mujyi wa Rubavu ugenda uhura n’imyanda imenwa ku muhanda,ahandi ugasanga haragizwe ubwiherero kuko abaturage bihagarika ku nkuta z’amazu.

Iki kibazo ugisanga nko mu Kagari ka Mbugangali, aho baturage bamena imyanda ahantu hatandukanye.

Muri aka karere, muri Nzeri ubuyobozi bwahagaritse mu kazi mu gihe cy’amezi abiri abanyamabanga nshingwabikorwa b’imirenge ibiri n’uw’akagari bazira umwanda ugaragara aho bayobora nyuma y’aho Umukuru w’Igihugu ahanyuze akawuhabona.

Mu gihe ikibazo cy’isuku nke kibonwa na bose, Ntezimana N. Jackson uyobora Koperative KOPIBO yatsindiye gutwara imyanda mu duce twa Kivumu, Umuganda na Mbugangari, yavuze ko impamvu hakigaragara imyanda bituruka ku myumvire y’abaturage itaranoga kuko banga kwishyura amafaranga y’isuku.

Yagize ati “Impamvu ni uko abaturage bataramenya isuku icyo aricyo cyane cyane nka Mbugangari mu myaka yose twakoze ibintu bimeze nk’aho ari bishya n’abantu ni ukongera kubwiriza, tukabasobanurira, kuko hari aho ugera bakakubwira ko badateka, bakakwinjiza mu nzu ukabona nta mbabura ihari. Hakwiye kubaho ubukangurambaga ku buyobozi mu bihe by’umuganda, bakumvisha abaturage akamaro ko gutwara imyanda kandi bigirwe itegeko.”

Yakomeje avuga ko abavuga ko badateka n’abandi badatwarirwa imyanda ari bo bayimena mu mihanda kuko ntaho kuyishyira bafite.

Umuhuzabikorwa wa Koperative Acape ikora isuku mu Mujyi wa Rubavu, Sibomana Ladislas, yavuze ko ikibazo kiri mu baturage batarumva ko koperative zikora ubucuruzi bagomba kwishyura kubera serivisi bahabwa.

Yagize ati ”Hari abantu bakeka ko iyo twaje ari ibikorwa by’ubugiraneza mu gihe twebwe tugura ibyangombwa tukanasora kubera imirimo dukora; uretse n’ibyo tugura lisansi n’ibindi bidutwara amafaranga, tugomba kunguka.”

Akomeza avuga ko hagakwiye kumvishwa abaturage impamvu yo gutanga amafaranga y’isuku.

Yagize ati “Ari ibintu biteguye neza abayobozi bibanze bagashyiramo imbaraga, bakaba abahuza hagati y’ abaturage na za sosiyete, buri umwe akuzuza inshingano ze, umwanda wacika naho abo batishyura nibo baca inyuma bagata imyanda mu mihanda.”

Nubwo amakoperative ashinzwe isuku ashyira ikibazo ku baturage, Umunyamabanga Nshingwabikorwa w’Umurenge wa Gisenyi, Uwimana Vedaste, we yashyize mu majwi ba rwiyemezamirimo bafite isoko ryo gutwara imyanda ko nta bushobozi.

Yagize ati “Icya mbere ntabwo twavuga ngo umwanda ntucika nta n’ubwo uzanacika, hari icyagabanutse nyuma yo kuganiriza abaturage, tubona byaratanze umusaruro ikompanyi z’isuku nazo zibifitemo uruhare, twe ku ruhande rwacu twagaragaje ko zidashoboye dutegereje ko isoko akarere katanze zizahinduka ariko ibyo ntabwo byaba intandaro y’uko abaturage bamena imyanda mu muhanda. Isuku ni uguhozaho kandi murabona ko nta muntu ugikandagira mu busitani bitewe n’ingamba zafashwe. ’’

Ku kuba ikompanyi zivuga ko abaturage batabyumva neza bigatuma badatanga imyanda bitwaje ko badateka yabihakanye avuga ko ntawabigaragaje. Ati ’’Ibyo ntawabitugaragarije. Aho twajyanye abaturage barabyumva neza nta kibazo gihari.’’

Aha naho twasanze hari imyanda hagati mu ngo z'abaturage
Ahashyizwe imyenda itarahagenewe kuyiharunda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza