Rubavu: Afunzwe azira kwiyita umukozi wa RIB

Yanditswe na Mukwaya Olivier
Kuya 6 Kamena 2019 saa 09:19
Yasuwe :
0 0

Uwitwa Hakorimana Emmanuel afunzwe akurikiranweho kwiyitirira ko ari umukozi w’Urwego rw’Ubugenzacyaha, RIB, akagenda abwira abantu ko bafite amadosiye mu Bugenzacyaha, akabaka amafaranga abizeza kuzayarangiza badakurikiranwe.

Uyu Hakorimana yafashwe amaze guhabwa 50000 frw n’uwitwa Umunyana Divine, amubwira ko afite amakuru ko hari mugenzi we ukorera mu Mujyi wa Kigali ufite dosiye muri RIB kandi bikaba byaragaragaye ko avugana na we cyane, none ngo nashake amafaranga abimukureho.

Ngo yagiye kureba na wa muntu na we amwaka 150,000frw amubwira ko hari amanyanga yakoze mu kazi bakaba bamureze muri RIB. Yaje kumwemerera ko ari bumubonere 50,000frw, kuko nta cyaha yicyekaga abimenyesha RIB, afatirwa mu cyuho amaze kuyakira.

Umuvugizi w’Urwego rw’igihugu rushinzwe Ubugenzacyaha, Mbabazi Modeste, yemeza aya makuru, asaba abaturage kwirinda ababeshya kuko serivisi za RIB zitagurwa.

Ati “Twamufashe ejo yiyita umukozi wa RIB akabwira abantu ko bafite amadosiye kuri RIB ko bamuha amafaranga akabafasha kudakurikiranwa, umuturage umwe yagiye amwaka amafaranga kuko nta cyaha yikekaga atanga amakuru. Ndamushimira kuko ntabwo Ubugenzacyaha bucuruza’’

Akomeza avuga ko ibyo yakoze birimo ibyaha nk’ubwambuzi bushukana no kwiyitirira urwego adakorera.

Amakuru twabashije kubona nuko uyu Hakorimana Emmanuel atari ubwa mbere afunzwe kuri iki cyaha cy’ubwambuzi bushukana n’ububeshyi, kuko yarekuwe muri uyu mwaka arangije igihano cy’umwaka yari yarakatiwe n’urukiko rwibanze rwa Kicukiro aho yarafungiwe muri gereza ya Mageragere.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza