Rubavu : Akarere gahangayikishijwe n’abakibyara mu buryo kise ‘Akajagari’

Yanditswe na Uwishyaka Jean Louis
Kuya 16 Ugushyingo 2016 saa 08:48
Yasuwe :
0 0

Ubuyobozi bw’Akarere ka Rubavu butangaza ko buhangayikishijwe n’abaturage bakomeje kubyara mu cyo bwise akajagari, bitewe n’uko kuboneza urubyaro bikiri ingorabahizi, kuko bamwe mu baturage babyara batitaye ku bushobozi bafite bwo kurera.

Ubushakashatsi bwashyizwe ahagaragara n’ikigega cy’umuryango w’abibumbye cyita ku baturage (UNFPA) kinafite mu nshingano gahunda zo kuboneza urubyaro, bwakorewe ku bantu bafite kuva ku myaka 19 kugera kuri 45, bugaragaza ko Akarere ka Rubavu kari hasi mu kuboneza urubyaro, kuko kari ku kigeraranyo cya 44%.

Sinamenye Jeremie, Umuyobozi w’Akarere ka Rubavu avuga ko abaturage ayoboye batitabira gahunda yo kuboneza urubyaro ku kigero cyifuzwa, bimwe mu bitera ubucucike buri hejuru muri aka karere.

Ati ’’Dufite ubucucike buri hejuru cyane kuko abaturage 1000 batuye kuri Kirometero imwe; ntibinajyanye n’ubuso bw’akarere. Ku myororokere usanga gahunda yo kuboneza urubyaro ikorwa ariko bikiri hasi, ikibazo kiri mu bantu, babyara mu kajagari abana badashoboye kurera ugasanga umubare w’abana bafite ntujyanye n’ubushobozi bwabo.”

Akomeza avuga ko kuba ababyeyi babyara mu kajagari bigira ingaruka ku igenamigambi igihugu kiba gishaka kugeraho mu gihe riba rishingiye ku muturage.

Ati "Usanga umubare w’abana udahuye n’ubushobozi bafite. Gutegura igenamigambi bigomba kujyana n’imyororokere mu rwego rwo kugira ngo abantu bakore igenamigambi rishingiye ku mibare y’abantu n’aho batuye kuva ku kagari kugera ku karere.’’

Dr Agnes Ntibanyurwa, umuyobozi wungirije w’ikigega cy’umuryango w’abibumbye cyita ku baturage (UNFPA), yemeza ko imibare y’ababoneza urubyaro ikiri hasi cyane aho ku rwego rw’igihugu, ababikora ari 48%, mu Karere ka Rubavu bikaba bigeze kuri 44%.

Agira ati ’’Aka karere karacyari hasi mu koboneza urubyaro mu Ntara y’Uburengerazuba. Turifuza ko bikomeza kwiyongera kuko bibangamira igenamigambi ry’igihugu; abantu bakwiye kwifashisha gahunda zitandukanye zo kuboneza urubyaro mu rwego rwo kwirinda kubyara abo badashoboye kurera.’’

Uretse akarere ka Rubavu kari kuri 44% mu kuboneza urubyaro, Nyabihu yo ihagaze kuri 47%, Ngororero 45%, Rutsiro 42%, Rusizi 37% naho Nyamasheke yo ihagaze ku gipimo cya 34%.

Akarere ka Rubavu kari hejuru mu gukoresha uburyo bw’ibinini mu kuboneza urubyaro, kuko kari ku gipimo cya 51%, mu gihe Karongi ifite 50% naho abakoresha ubu buryo mu karere ka Nyamasheke bari hasi kuko bangana na 41%.

Mu Karere ka Rubavu, kubyara ku bangavu biri kuri 5.6% mu gihe hari intego yo kubigabanya ku buryo mu mwaka wa 2018 bizaba biri kuri 3.3%.

Meya Sinamenye avuga ko bafite ubucucike bukabije bitewe n'uko abagore batitabira kuboneza urubyaro uko bikwiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza