Rubavu: Babiri bakekwaho ubujura bishwe bagerageza kurwanya polisi

Yanditswe na Kanamugire Emmanuel
Kuya 14 Ugushyingo 2016 saa 05:54
Yasuwe : XX
0

Abagabo babiri bo mu Karere ka Rubavu, bakekwaho ubujura barashwe na polisi bahita bapfa nyuma yo gushaka kuyirwanya, bakoresheje imipanga bari bitwaje.

Aba ni Ndayambaje Etienne w’imyaka 25 ukomoka mu Murenge wa Kanama na Ishimwe Eric ukomoka mu karere ka Rutsiro ariko wari utuye mu murenge wa Rugerero, bishwe mu ijoro ryakeye.

Umuvugizi wa Polisi mu Ntara y’Uburengerazuba, CIP Kanamugire Theobald, yemeje ko aba bagabo barashwe nyuma yo gushaka guhangana na Polisi, bitwaje intwaro gakondo bibishaga.

Yagize ati “Hari amakuru twari dufite, ko hari umupasiteri bibye ku wa Gatandatu, twaje kumenya aho bahishe ibyo bibye, dukora umukwabu ngo tubashakishe ari na bwo tukibabona bafite n’ibyo bintu bazanye imipanga nk’uko muyireba hariya, bashaka kurwanya abapolisi bibaviramo kuraswa babiri bitaba Imana, abandi bariruka.”

CIP Kanamugire yakomeje avuga ko mu byo bari bibye harimo za mudasobwa, televiziyo za rutura, amasaha, imyenda n’ibihumbi icyenda by’amadolari.

Mudasobwa ebyiri, imyenda na telefone byabonetse na ho amafaranga akaba ari yo yari agishakishwa.

Yatanze ubutumwa ku biba n’abafite umugambi wabyo kubireka kuko ingamba polisi ifite zitazabagwa amahoro.

Akarere ka Rubavu gakunze kwibasirwa n’abajura bitwaje intwaro batobora inzu, ndetse bakanatega abantu mu ijoro bakabambura bakanabakubita. Abagera kuri 25 bafunzwe bazira ibyaha by’ubujura ndetse bamwe bamaze gukatirwa n’inkiko nk’uko CIP Kanamugire yabitangaje.

Kamwe mu duce abajura bagize indiri mu Karere ka Rubavu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza