Rubavu: Bralirwa yahaye ifumbire na mituweli abaturage bo mu Murenge ikoreramo

Yanditswe na Mukwaya Olivier
Kuya 2 Gicurasi 2019 saa 04:18
Yasuwe :
0 0

Uruganda rwenga ibinyobwa bisembuye n’ibidasembuye, Bralirwa, rwageneye abaturage bo mu Murenge wa Nyamyumba, Akarere ka Rubavu ifumbire na mituweli.

Bralirwa ifite urwengero rw’inzoga mu Murenge wa Nyamyumba. Abaturage bo muri uyu murenge 38 000, bazahabwa ifumbire naho abagera ku 1000 bahabwe ubwisungane mu kwivuza ‘mituweli’.

Abaturage bavuga ko iyi nkunga bahawe izatuma umusaruro wabo w’ubuhinzi wiyongera kuko bahawe ifumbire kandi banagire ubuzima bwiza kuko n’uwarwara yakwivuza.

Chantal Nyiranzajyibwami, umuturage wo mu Murenge wa Nyamyumba, yashimiye Bralirwa kuko nta mituweli yagiraga avuga kandi ko umusaruro uziyongera kubera ifumbire.

Ati “Byangoraga kubona mituweli n’ubu iy’uyu mwaka ntayo nari mfite niyo narwaraga byangoraga kwivuza. Banatwemereye ifumbire izadufasha kuko inaha twahingaga ntitubashe kubona umusaruro uhagije kubera kutagira ifumbire ihagije”.

Munyagisenyi Marcel na we yashimiye Bralirwa avuga ko ifumbire igiye kuzajya ibagoboka kuko byagoraga abadafite amatungo yabaha ifumbire.

Ati “Bralirwa irakoze cyane rwose ubu umusaruro ugiye kwiyongera kuko nk’abaturage tutagira amatungo byatugoraga kubona ifumbire”.

Batamuriza Aline ushinzwe imikoranire n’izindi nzego n’itumanaho muri Bralirwa, yabwiye abaturage ko Bralirwa ifite gahunda yo kuzamura imibereho myiza n’umusaruro w’aho ikorerera.

Ati “Bralirwa irajwe inshinga n’iterambere ry’abaturage baho ikorera hano i Rubavu. Uyu munsi uretse mituweli tugiye no kubaha ifumbire ihoraho mu rwego rwo kongera umusaruro kugira ngo imibereho yanyu izamuke”.

Yabibukije ko Bralirwa yatanze inkunga ya miliyoni 160 Frw zo kwagura inyubako z’ibitaro bya Gisenyi, ibi bikaba bishimangira ko rutirengagiza imibereho myiza y’abanyarwanda ari na bo bakiliya barwo b’imena.

Umunyamabanga Nshingwabikorwa w’Umurenge wa Nyamyumba, Murenzi Augustin, yavuze ko iyi nkunga ya Bralirwa babonye bagiye guhera ku bacitse kw’icumu rya jenoside batishoboye bakurikizeho abo mu cyiciro cya kabiri cy’Ubudehe kuko ari bo bigaragara ko bakennye.

Yakomeje avuga ko ku bufatanye na Bralirwa bagiye gutangira kubigisha uko bazakoresha neza ifumbire kugira ngo umusaruro wiyongere.

Imyaka 60 irashize Bralirwa itangiye gukorera mu Rwanda, aho icuruza ibinyobwa ikanashora amafaranga menshi mu bikorwa by’ingenzi bigamije guhindura no guteza imbere imibereho myiza y’abaturage, by’umwihariko mu Karere ka Rubavu.

Umwaka ushize Bralirwa ku bufatanye na Heineken Africa Foundation (HAF) bashyize ibuye ry’ifatizo ahagiye kubakwa inzu izajya yakira ababyeyi bagize ibibazo bituma batinda mu Bitaro bya Gisenyi, izatwara miliyoni 170 Frw.Iyo nzu y’ababyeyi izajya yakira abagera kuri 60.

Bralirwa yashyikirije ubuyobozi bw’akarere ka Rubavu matola 260 zizahabwa ibitaro bya Gisenyi n’abaturage bahuye n’ibiza ku mugezi wa Sebeya.

Muri Mata umwaka ushize, abakozi ba Bralirwa batanze inkunga ya miliyoni eshanu yo gufasha Akarere ka Rubavu kurihira ubwisungane mu kwivuza abatishoboye.

Batamuriza Aline ushinzwe imikoranire n’izindi nzego n’itumanaho muri Bralirwa, yavuze ko uru ruganda rwita ku mibereho y'abaturage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza