Rubavu: Congo yasubijwe umusirikare mukuru wafatiwe mu Rwanda

Yanditswe na Kanamugire Emmanuel
Kuya 12 Ukwakira 2016 saa 02:40
46 31

Umusirikare wa FARDC wafatiwe ku butaka bw’u Rwanda ahitwa Kanyesheja mu murenge wa Busasamana, mu karere ka Rubavu, kuwa 9 Ukwakira, yasubijwe mu gihugu cye.

Banango Bukware ufite ipeti rya Sous Lieutenant yatangarije IGIHE ko yafashwe mu masaha y’ijoro yatinze gutaha, ubwo yari avuye kubonana n’abayobozi be maze akayoberwa uko yageze ku butaka bw’u Rwanda.

Yagize ati “Natashye bwije nyoboberwa uko narenze urubibi,nisanga narenzeho metero eshanu; nta mugambi mubi nari mfite, ni ukuyoberwa urubibi gusa.”

Akomeza avuga ko mu Rwanda yafashwe neza muri iyi minsi ine ahamaze akaba yumva ko gusubira iwabo nta kibazo bimuteye.

Lt Col Cassius James wari uhagarariye ingabo z’u Rwanda avuga ko uyu musirikare yafatiwe ku butaka bw’u Rwanda mu masaha y’ijoro yayobye yemeza ko yafatanwe imbunda n’amasasu.

Yagize ati “Uyu musirikare yafatiwe ku butaka bw’ u Rwanda kubera kuyoba atazi aho ari kunyura kuko bwari bwije cyane, twamufatanye imbunda yo mu bwoko bwa AKM 47,nomero 4340 afite na magazine 2 n’amasasu 40. Twaramwakiriye duteganya kumushyikiriza ingabo za EJVM cyane ko dufitanye imikoranire myiza.”

Col Fulbert OKANDZA uhagarariye ingabo za EJVM, yishimiye igikorwa cyo gutanga uyu musirikare yemeza ko bishimangira ubufatanye n’ingabo z’u Rwanda.

Ati “Turashima imikoranire myiza dufitanye n’ingabo za RDF; ibi bikunze kubaho kenshi abasirikare ba Congo bayoberwa imbibi ariko turashima uburyo nk’ubu bwo guhererekanya ingabo.”

Bisanzwe bibaho ko abasirikare ba Congo barenga umupaka bakaza mu Rwanda bakaza gushyikirizwa Congo uretse Caporal Mambo Vert wanangiye gusubirayo kuko we avuga ko yaje ahunze kandi akaba afashwe neza mu Rwanda akavuga ko asubiyeyo yagirirwa nabi n’abayobozi be.

Ubwo twabazaga Lt Col Cassius James amakuru y’uyu musirikare, yatubwiye ko abayeho neza hakaba hategerejwe icyemezo cya EJVM kuko ubu bari mu biganiro n’ingabo za Congo ,FARDC.

Sous Lieutenant Banango Bukware yasubijwe iwabo
Ingabo z'impande zombi mu biganiro
Abasirikare ku mpande zombi ubwo bari ku mupaka munini uhuza u Rwanda na Congo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE