Rubavu: Itorero ry’Abacunguwe ryahaye abatishoboye 100 mituweli, rinaboroza amatungo magufi

Yanditswe na Mukwaya olivier
Kuya 17 Nzeri 2017 saa 10:00
Yasuwe :
0 0

Abakirisitu bo mu Itorero ry’Abacunguwe n’Imana (Redeemed Christian Gospel) rifite icyicaro mu Mujyi wa Kigali bahaye imiryango 100 y’abatishoboye bo mu Murenge wa Nyakiriba ubwisungane mu kwivuza banaboroza amatungo magufi arimo ihene 25.

Iki gikorwa kiri muri gahunda abasengera muri iri torero biyemeje yo kuba hafi no gufasha abababaye hagamijwe kongera kubaremamo icyizere cy’ubuzima.

Abaturage b’i Nyakiriba batangarije IGIHE ko bugarijwe n’ikibazo cy’imirire mibi iturutse ku ibura ry’ibiribwa banashimangira ko aya matungo azabafasha kwiyishyurira ubwisungane mu kwivuza umwaka utaha namara kubyara.

Maniriho Pascaline yagize ati “Bandihiye mituweli bampa n’ihene. Ubu ngiye kuyorora izamfasha mu minsi iri imbere. Nari mbayeho nabi, nacaga inshuro naronka nkagaburira abana banjye bane. Imana ihimbazwe cyane ko na bo babatangiye ubwisungane mu kwivuza.”

Ndagijimana Jean De dieu we yagize ati “Abana banjye n’umugore barihiwe ubwisungane. Ndashaka ikiraka nange nirihire kandi iyi hene bampaye izamfasha kuko nibyara nka kabiri izamvana mu bwigunge ku buryo ubutaha nzishyura mituweli mu ba mbere.”

Umuyobozi w’Itorero Redeemed Christian Gospel mu Rwanda, Pasiteri Ayobami Oladaku, ashimira Perezida Kagame wazanye Girinka ikaba ari nayo mpamvu bamukurikije aho baheruka gutanga inka 75.

Yagize ati “Twafatanyije n’abakirisitu bacu dutanga mituweli ku miryango 50 kandi tuzakomeza ibi bikorwa by’ubugiraneza mu turere twa Gasabo na Bugesera aho tuzatanga inka eshanu na mituweli 250. Iyi gahunda ni iyo gufasha abantu guhindura ubuzima abantu bakagira ubuzima bwiza nkuko Perezida Kagame yabikoze akanatangiza gahunda ya Girinka. Ni we twafatiyeho icyitegererezo. ”

Umunyamabanga Nshingwabikorwa w’Umurenge wa Nyakiriba, Hagenimana Epimaque, ashima iki gikorwa cyakozwe n’aba bakirisitu.

Yagize ati “Bariya baturage twabahisemo kubera ko ubushobozi bwabo ari buke bakaba bafashwa kubona mituweli n’itungo rikaba ryabafasha mu mibereho yabo ya buri munsi. Ibi bizatuma ubutaha bazajya bishakamo ibisubizo biturutse kuri iryo tungo babashe kwirihira ubwisungane mu kwivuza.”

Umurenge wa Nyakiriba ugeze kuri 64% mu gutanga mituweli gusa n’ubwo ukungahaye ku bihingwa usanga hakigaragara ikibazo cy’imirire mibi mu baturage.

Abagera ku 100 batishoboye bahawe mituweli
Borojwe n'amatungo magufi
Umuyobozi w’Itorero Redeemed Christian Gospel mu Rwanda, Pasiteri Ayobami Oladaku, yavuze ko bazakomeza gufasha abatishoboye
Umunyamabanga Nshingwabikorwa w’Umurenge wa Nyakiriba, Hagenimana Epimaque, yashimye igikorwa cyakozwe n’aba bakirisitu
Hagenimana Epimaque ashyikirizwa mituweli zahawe abaturage ayobora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza