Rubavu :Koperative ‘Unama Ukore’ ntivuga rumwe n’akarere ku kibanza kayemereye

Yanditswe na Kanamugire Emmanuel
Kuya 21 Ugushyingo 2016 saa 01:02
Yasuwe :
0 0

Abanyamuryango ba Koperative Unama Ukore ikora ubucuruzi bw’imyenda n’inkweto mu mujyi wa Gisenyi, irasaba akarere ikibanza kabemereye kuwa 14 Werurwe 2014 nk’ishimwe ryo kwibumbira hamwe no gukangurira abandi kuva mu bucuruzi bw’akajagari.

Aba banyamuryango bavuga ko nyuma y’aho akarere kabakanguriye kwibumbira hamwe no kuva mu bucuruizi bwa magendu, bateranye batumira ubuyobozi bw’akarere bwari buyobowe na Sheikh Bahame Hussan, abemerera ikibanza mu rwego rwo gukomeza kwiteza imbere.

Koperative yabo igizwe n’abagore bahoze bakora ubucuruzi bwa magendu bavana ibintu muri Repubulika Iharanira Demokarasi ya Congo.

Umugwaneza Justine, Umuyobozi wa Koperative aragira ati ”Akarere kadushishikarije kwibumbira hamwe no kuva mu bucuruzi bwa magendu; twabivuyemo ndetse tuvanamo n’abandi benshi. Ubuyobozi bwatwemereye ikibanza ahahoze isoko rya Nyakabungo, ku wa 14 werurwe 2014, ariko twarategereje amaso yaheze mu kirere.”

Akomeza avuga ko kuba batarahawe ikibanza bikomeje kubakururira ibihombo no kuba hari abashaka kuva mu bucuruzi bwa magendu banze kwakira kuko ntaho babashyira n’ibindi.

Bahame Hassan wari Umuyobozi w’Akarere ka Rubavu muri Werurwe 2014, abemerera icyo kibanza yagize ati ”Nishimiye uburyo aba bagore n’abakobwa bakiri bato bishyize hamwe; mbere bari ikibazo gikomeye kuri aka karere ka Rubavu. Baregerewe bishyira hamwe kandi ibyo bamaze kugeraho birashimishije cyane. Niyo mpamvu dusanze twebwe nk’akarere tugomba kubegera tukabafasha ngo bave mu bukode”.

Yakomeje agira ati “Ibyo bamaze kugeraho bigaragaza ko barimo kwigira, nk’akarere ni ngombwa ko tubatera inkunga. Bafite umugambi mwiza wo gutera imbere twiyemeje kubafasha bakava mu buzima bw’ubukode bagakorera ahantu hagutse.”

Kuri ubu Bahame avuga ko nta mwanzuro ubemerera ikibanza wigeze ufatwa ahubwo cyari icyifuzo.

Kuri ubu Bahame avuga ko nta mwanzuro ubemerera ikibanza wigeze ufatwa ahubwo cyari icyifuzo.

Murenzi Janvier, Umuyobozi w’akarere ka Rubavu wungirije ushinzwe iterambere ry’ubukungu yemeza ko atazi niba hari umwanzuro wafashwe n’akarere wo gutanga ikibanza kuri iyi koperative ahubwo akabasaba kwandika basaba gufashwa bikigwaho.

Aragira ati “Uruhare rwa Koperative mu guca ubucuruzi butemewe turarubona rwose, ariko nta baruwa twabonye icyo gihe ubuyobozi bw’akarere bwanditse bwemeza ko butanze ikibanza; niba bashaka gufashwa nibandike ibaruwa tubyigeho terebe niba banafite ubushobozi, niba ari abafashwa bafashwe .”

Hagati aho ariko ubuyobozi bw’iyi Koperative bwemeza ko bwandikiye akarere amabaruwa agera kuri ane, ariko bakaba nta gisubizo bahawe.

Igishushanyo cy'isoko Koperative Unama Ukore yateganyaga kubaka
I Nyakabungo ahahoze gare ni ho bateganyaga kubaka iri soko ry'imyenda rigezweho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza