Rubavu: Umugore yafashwe atwaye urumogi mu gihaza

Yanditswe na Philbert Girinema
Kuya 7 Mutarama 2017 saa 08:15
39 26

Polisi ikorera mu Karere ka Rubavu yafashe umugore wari utwaye udupfunyika tw’urumogi 1300 mu gihaza nyuma yo kwihindura umucuruzi wabyo.

Uyu mugore yafashwe tariki ya 5 Mutarama ku mupaka wa La Corniche yihinduye umucuruzi w’ibihaza ariko atwayemo urumogi.
Umuyobozi wa Polisi mu Karere ka Rubavu, SSP Callixte Kalisa yasobanuye uko abashinzwe umutekano batahuye uyu mugore.

Ati “Twabonye amakuru ko uyu mugore acuruza urumogi akoresheje amayeri atandukanye; igihe yerekanaga ibyo afite ku mupaka, twamusatse tubyitondeye nibwo twamusanganaga udupfunyika 1300 tw’urumogi muri kimwe mu bihaza byagaragaraga ko acuruza. Yari yaragitoboye neza ku mutwe maze akuramo iby’imbere yuzuzamo turiya dupfunyika, asubizaho neza agace yari yarakuyeho.”

Yakomeje agira ati “si inshuro ya mbere Polisi ifashe umucuruzi w’ibiyobyabwenge wabitwaye akoresheje amayeri adasanzwe; hari ababizengurutsa umubiri wabo bakabyambariraho, hari ababiheka mu mugongo ukagira ngo ni abana bahetse, hari n’uwo twafashe abitwaye mu cyansi nk’amata.”

Polisi ikomeje ivuga ko hari abafatwa babitwaye mu nkweto, abandi babicisha mu kiyaga cya Kivu, abandi bakabitwara mu ngofero ndetse ko hari n’abakoresha abana bato mu kubitwara.

Mu karere bituranye ka Musanze, Polisi ihakorera yakajije imikwabu yo gufata no kurwanya ibiyobyabwenge cyane cyane hibandwa mu rubyiruko n’abana nk’amatsinda yibasiwe n’ibiyobyabwenge.

IP Viateur Ntiyamira , ushinzwe guhuza ibikorwa bya Polisi n’abaturage muri Musanze yatangaje ko hari abana benshi bafashwe bafite ibiyobyabwenge, bakusanyirizwa hamwe ngo bigishwe ububi bwabyo. Ibi byatumye hashingwa amatsinda 70 arwanya ibiyobyabwenge mu bigo by’amashuri 28;37 arwanya ibiyobyabwenge mu rubyiruko rw’abakorerabushake, amatsinda 5 nka yo yashinzwe mu banyonzi n’abamotari yose akorera mu Karere ka Musanze.

Yibukije ko muntu wese ushora umwana mu ikoreshwa ry’ibiyobyabwenge mu buryo ubwo ari bwo bwose ateganyirizwa igifungo kigera ku myaka 7 n’ihazabu igera kuri miliyoni eshanu z’amafaranga nk’uko biteganywa n’ingingo ya 596 mu gitabo cy’amategeko ahana.

Mu ngingo ya 220 ho, havuga ko ushora umwana mu biyobyabwenge no mu ikwirakwizwa ry’intwaro cyangwa ubucuruzi bw’ibintu bitemewe ahanishwa igifungo kigera ku myaka itanu n’ihazabu igera kuri miliyoni 5 z’amafaranga.

Ingingo ya 593 yo ivuga ko gutera, kugurisha, guhindura, gutunda, gushyingura no kunywa ibiyobyabwenge bibujijwe kandi bihanishwa igifungo kuva ku myaka 3 kugeza kuri itanu n’ihazabu guhera ku 500,000 kugeza kuri 5,000,000 z’amafaranga.

Uburyo uyu mugore yari yatwaye urumogi mu bihaza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE