Kwamamaza

Rubavu: Uruhuri rw’ibibazo rwatumye amatora ya Koperative y’abamotari aburizwamo

Yanditswe kuya 15-10-2016 saa 07:12' na Mukwaya Olivier


Abanyamuryango ba Koperative y’Abamotari ikorera mu Murenge wa Gisenyi mu Karere ka Rubavu (COSTEMU- Cooperative des Taxi-Moto de Rubavu) baravuga ko batewe impungenge n’imikoreshereze y’amafaranga yabo, bamwe bagatunga urutoki ubuyobozi ko bwaba bwarayanyereje.

Ibi ni ibyatangarijwe mu nama isanzwe yabaye kuri uyu wa Kane, tariki ya 13 Ukwakira 2016, yahuje abamotari bagize iyi Koperative n’inzego zitandukanye harimo na Polisi ikorera muri aka Karere.

Bamwe mu bamotari batangaje ko hari umwuka mubi muri Koperative, bashyira mu majwi Perezida wayo ko yabambuye amafaranga.

Kanyamuhanda Enock, ukora akazi ko gutwara abantu kuri moto yatangarije IGIHE ko ababajwe nuko Perezida wa Koperative yanyereje amafaranga menshi y’abanyamuryango, akaba yidegembya ntakurikiranwe.

Yagize ati “Twishyuye ibihumbi 25 000 byo gushaka uburenganzira bwo gutwara (autorisation de transport), ndetse n’amafaranga ibihumbi icumi byo gutegera Perezida agiye muri RURA. Nta munyamuryango utarayatanze, none hashize umwaka n’amezi atatu tutarabona ibyo byangombwa, ahubwo twirirwa dukwepa abapolisi mu muhanda.”

Yakomeje agira ati “ Twamenye ko amafaranga yanyerejwe n’ubuyobozi. Twishyura amafaranga 200 y’umusanzu buri munsi ajya mu isanduku ya koperative, ariko ntituzi icyo akoreshwa, ubu hashize imyaka ibiri nta nama iba kuko n’iyi ibaye kubera impuruza twagejeje ku Muyobozi wa Polisi mu Ntara.”

Ndayisaba Yves Jimmy we yatangaje ko atumva impamvu Komite yarangije manda yayo ariko ntihakorwe andi matora.

Yagize ati “Si nibyo by’amafaranga gusa, twe turibaza impamvu Komite yarangije igihe yari yatorewe, none imyaka ibiri ikaba ishize bataratumiza indi nama ngo bategure amatora. Ntabwo tugomba kubitekerezaho kuko bariya ntibakiri abayobozi bacu.”

Umwe mu bayobozi ba Koperative, Baritonda Djuma, wasinyaga ku nyandiko z’amafaranga agomba gutangwa, yatangaje ko atazi irengero ry’amafaranga bivugwa ko yanyerejwe.

Ati “ Njye mperuka mu nama ya Komite ku wa 27 Mata 2016 ari nabwo banyigijeyo nkaba nta makuru nkimenya. Gusa abanyamuryango bararye bari menge kuko n’abafashe moto z’ideni ntizishyuwe.”

Polisi yabijeje ubufasha mu gukurikirana abaregwa

Umuyobozi wa Polisi mu Karere ka Rubavu, Superintendent Kalisa Callixte, yabasabye gutora Komite nshya yabafasha gukurikirana umutungo wabo wanyerejwe.

Yagize ati “ Birababaje ukuntu twajyaga tuganira iterambere none tukaba tuje mu bijyanye n’ubujura. Amakuru ndayabonye ngiye kubikurikirana ababigizemo uruhare bahanwe. Murahitamo abatanga ikirego cyangwa mutore komite bandike duhere kuri iki kirego. Ntitwabyihanganira rwose ni uburiganya bukomeye, nshigikiye ko Komite yari iriho ivanwaho kuko iracyekwaho ubwambuzi.”

Umuyobozi w’Ihuriro ry’Abamotari mu Karere ka Rubavu, (UCOTRAMORU-Union Des Cooperatives des Motard de Rubavu), Gafora Sentibagwe nyuma yo kugerageza gukoresha amatora bikananirana yatangaje azitabaza izindi nzego.

Yagize ati “Ngiye kwiyambaza abashinzwe Koperative mu Karere n’Urwego Rushinzwe Koperative mu gihugu bazadufashe gukoresha amatora kuko ndabona kumvikana byagoranye.”

UCOTRAMORU ihuriyemo amakoperative 17, abarurirwamo abamotari basaga 3400.

Abamotari banze ko batora Komite nshya ya Koperative
Abamotari batunga agatoki ubuyobozi bwabo ko bwanyereje umutungo wa Koperative
Umuyobozi wa Polisi mu Karere ka Rubavu, Superitendent Kalisa Callixte, yatangaje ko agiye gukurikirana iki kibazo
Umuyobozi w’Ihuriro ry’Abamotari mu Karere ka Rubavu, Gafora Sentibagwe yatangaje ko agiye kwitabaza izindi nzego
Babanje kwanga ko umuyobozi ataha ibibazo byabo bitaracyemuka

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved