Rubavu: Babiri batawe muri yombi bambutsa ibiro 250 by’urumogi bavanye muri Congo

Yanditswe na Ishimwe Israel
Kuya 9 Mutarama 2017 saa 11:58
33 26

Nyuma y’iminsi ine hafashwe umugore wari utwaye urumogi mu gihaza, Polisi y’u Rwanda ikorera mu karere ka Rubavu yerekanye Abasore babiri bafatanywe ibiro 250 by’urumogi kuri uyu wa Gatandatu saa tatu n’igice z’ijoro babinyujije mu mazi y’ikiyaga cya Kivu.

Aba basore bari mu maboko ya polisi kuri Sitasiyo ya Gisenyi kuva mu ijoro ryo kuwa 7 Mutarama 2017.

Umwe muri bo avuga ko urwo rumogi bari barujyanye mu mujyi wa Kigali kandi ko rwinjiye mu Rwanda runyujijwe inzira y’amazi kuva muri Congo.

Umuvugizi wa Polisi mu Ntara y’Iburengerazuba, Chief Inspector of Police (CIP) Théobald Kanamugire, yatangaje ko uyu mugabo yinjije uru rumogi aruvanye muri Congo, ageze ku mupaka ashaka umumotari ngo agumye amucungire ko nta nzego z’umutekano zimubona, ariko kuko hari abaturage bamaze kumenya ko kwinjiza ibiyobyabwenge no gukora ibyaha mu Rwanda bitemewe, barababonye babatungira agatoki inzego z’umutekano nazo zihita zibafata.

CIP Kanamugire yakanguriye abaturage kwirinda kwishora mu bikorwa bibi by’ubucuruzi bw’ibiyobyabwenge, no kubinywa kuko bibagiraho ingaruka, anashimira abagize uruhare mu ifatwa ry’aba babyinjizaga.

Yaboneyeho umwanya wo gukangurira Abanyarwanda gukomeza ubufatanye na Polisi, batanga amakuru y’abacuruza ibiyobyabwenge ku gihe kugira ngo abo babyishoramo bafatwe.

Mu mwaka wa 2016 mu karere ka Rubavu hafashwe urumogi rungana n’ibiro ibihumbi Magana abiri(200.000 ) rwinjijwe mu Rwanda ruvanywe muri Repubulika Iharanira Demukarasi ya Congo.

Igitabo cy’amategeko ahana ibyaha mu Rwanda mu ngingo 594, mu gika cya kabiri ivuga ko umuntu wese winjiza ibiyobyabwenge mu buryo bunyuranyije n’amategeko ahanishwa igifungo kuva ku myaka itatu kugeza ku myaka itanu n’amande y’ibihumbi Magana atanu kugeza kuri miliyoni eshanu z’amafaranga y’u Rwanda, igihe cyose ahamwe n’icyo cyaha.

Aba basore bafatanywe ibiro 250 by'urumogi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE