Ruhango: Hatashywe ishuri ry’incuke ryubatswe n’Abanyarwanda babiri baba muri Canada

Yanditswe na Ishimwe Israel
Kuya 12 Mutarama 2017 saa 08:29
Yasuwe : XX
0

Abatuye mu Mudugudu wa Kavumu, mu Kagari ka Munanira mu Murenge wa Kabagali mu Karere ka Ruhango bamurikiwe ishuri ry’incuke bubakiwe ku nkunga y’Abanyarwanda babiri baba muri Canada.

Iri shuri ryatashywe ku mugaragaro kuwa 9 Mutarama 2017, ryubatswe ku nkunga y’Umuryango w’abagiraneza ‘Le Chemin de la Lumière/ Inzira y’Urumuri’ watangijwe n’Abanyarwanda babiri ndetse n’inshuti yabo ikomoka muri Canada.

Igitekerezo cyo kubaka iri shuri gifite imizi mu ruzinduko abagize uyu muryango barimo Marie Ntaganda, Adelphine Mukamanzi na Noreen Barbe bagiriye mu Rwanda mu Ukuboza 2011.

Ubwo basuraga umudugudu wa Kavumu bakaganiriza ababyeyi bahatuye, basanze bafite ikibazo cyo kutagira ishuri hafi, bagaragaza ko nibura abana babo bamara amasaha abiri mu nzira bajya kwiga, bavuga ko bibagiraho ingaruka mu myigire yabo.

Nyuma y’uru rugendo rwabo bahise begera umuryango wa AMIE (Aide internationale à l’enfance), umaze imyaka 40 ufasha abana bo mu bihugu bikiri mu nzira y’amajyambere, ukaba warageze no mu Rwanda mu myaka icumi ishize ubafasha kubona ibyangombwa byo gukorera mu gihugu mu buryo bwemewe n’amategeko.

Nyuma bahise batangira igikorwa cyo gukusanya amafaranga yo kubaka ishuri ry’incuke mu mudugudu wa Kavumu. Iri shuri ryubatse mu kibanza cyatanzwe na Diocese ya Kabgayi, yaniyemeje kuzahugura abarimu bazatangirana naryo.

Muri uyu mushinga bakusanyije ibihumbi 115 by’amadorali ya Amerika, asaga miliyoni 94 mu mafaranga y’u Rwanda yakoreshejwe hubakwa ibyumba bitatu by’amashuri y’incuke.

Intego nyamukuru ni ugufasha abana baturuka muri aka gace kubona uburezi bufite ireme, ndetse no kubaha amahirwe yo gutegura ahazaza habo nabo bakabasha kuzana impinduka mu miryango na sosiyete baturukamo.

Perezida wa Le Chemin de la Lumière, Marie Ntaganda yavuze ko bafite umushinga wo kubaka ishuri ribanza, abarangiza ay’incuke bashobora gukomerezamo amasomo yabo.

Atangaza ko ibi bizagerwaho ku bufatanye n’Akarere ka Ruhango ndetse n’abafatanyabikorwa batandukanye.

Akarere ka Ruhango kemeye ko kazajya gahemba abarimu no kubagenera agahimbazamusyi ndetse kakanafasha abaturuka mu miryango itishoboye kwiga bitabagoye.

Yakomeje asaba ababyeyi n’abana gufata neza iri shuri bakarigirira isuku kugira ngo bakomeze kurisigasira rizagirire akamaro n’abo mu bihe bizaza.

Ubuyobozi bw’Akarere ka Ruhango butangaza ko kuba hatangijwe iri shuri bizafasha no mu bindi bikorwaremezo bitandukanye birimo kwegerezwa amashanyarazi, amazi ndetse n’umuhanda mwiza.

Biteganyijwe ko iri shuri rizatangira gukorerwamo ubwo umwaka w’amashuri wa 2017/2018 uzaba utangiye kuya 23 Mutarama 2017.

Bafungura ku mugaragaro ishuri ry'incuke mu Mudugudu wa Kavumu
Marie Ntaganda na Adelphine Mukamanzi nyuma yo gutaha iri shuri
Bafata ifoto y'urwibutso nyuma yo gufungura ku mugaragaro ishuri ry'incuke
Abana bato bari babukereye baje kureba ishuri bubakiwe
Iri shuri ryubatse mu kibanza cyatanzwe na Diocese ya Kabgayi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza