Ruhango: Umugabo yaterejwe isambu cyamunara yishyuzwa indezo

Yanditswe na Umutoni Rosine
Kuya 14 Mutarama 2018 saa 09:58
Yasuwe :
0 0

Mu myaka irenga 10 ishize ni bwo Twahirwa Gilbert utuye mu Kagari ka Musamo mu Murenge wa Ruhango, yateye inda uwitwa Nyirabasare Seraphine babyarana umwana w’umukobwa.

Uyu mugabo wabanje kwihakana umwana kugeza ubwo uwo babyaranye yiyambaza inkiko, yaje kumuviramo ko isambu ye itezwa cyamunara kugira ngo haboneke indezo.

Bitewe n’uko aba babyeyi b’uyu mwana batigeze babana, mu mwaka wa 2010 Twahirwa Gilbert yaje guha isambu uyu mugore ngo izajye ivamo indezo y’umwana ndetse amuha n’ibihumbi 50 by’amafaranga y’u Rwanda ariko ngo mu minsi mike ishize bibaye yaje gutungurwa no kubona Umunyamabanga Nshingwabikorwa w’Akagari ka Musamo aje guteza cyamunara umunani umugore babana ubu yahawe n’iwabo.

Kugira ngo hatezwe cyamunara iyi sambu avuga ko ari umunani w’umugore (basezeranye ivangamutungo risesuye) we ngo byatewe n’uko yabanje kwihakana umwana, uwo bamubyaranye akiyambaza Urukiko rw’Ibanze rwa Ruhango rukamumwemeza.

Twahirwa aganira na TV1 yagize ati “Isambu yatejwe cyamunara ni iyo umugore wanjye yahawe nk’umunani iwabo, ni yo yari idutunze nta yindi sambu mfite. Nararenganye rwose”.

Akomeza avuga iyi sambu yagurishijwe hirengagijwe ko urubanza rwari rwararangijwe mbere impande zombi zibifashijwemo n’umuhesha w’inkiko utari uw’umwuga wo ku rwego rw’akagari zigira ibyo zumvikanaho birimo kuba hatanzwe umurima n’amafaranga y’u Rwanda ibihumbi 50 mu bihumbi 300 basabwaga n’urukiko.

Ngo impande zombi zari zumvikanye ko andi mafaranga naboneka bazayatanga kuko muri icyo gihe byari byagaragaye ko nta bundi bushobozi buhari.

Nyuma ariko uyu mugabo yatunguwe no kubona isambu rukumbi bari bafite yaragurishijwe agera ku bihumbi 900 by’amafaranga y’u Rwanda mu asaga miliyoni yabazwaga nk’indezo.

Umunyamabanga Nshingwabikorwa w’Umurenge wa Ruhango, Nahayo Jean Marie ari na we warangije uru rubanza nk’umuhesha w’inkiko utari uw’umwuga ku Murenge, avuga ko ibyo uyu muhesha w’inkiko w’umwuga wo ku rwego rw’akagari yakoze ari amakosa akomeye kuko bitari mu nshingano ze kurangiza imanza zaciwe n’inkiko uretse urwa Gacaca.

Yagize ati “Twakomeje kwinginga Twahirwa Gilbert ngo akemure mu bwumvikane ikibazo afitanye n’uwo babyaranye akabanza kwihakana umwana akinangira kugeza ubwo amategeko amugonze. Nakomeza kujenjeka ntatange ikirego gihagarikisha iyi ndezo yavuye ku bihumbi 230 ikaba igeze muri miliyoni izakomeza no kwiyongera”.

Benshi mu bagabo n’abasore bakunze gutera inda abakobwa cyangwa abagore bakihakana abana ariko inkiko zakwemeza ko ari ababo bakabona kuvuga ko n’ubundi batigeze babanga.

Twahirwa hamwe n'umugore we w'isezerano bavuga ko barenganyijwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza