Kwamamaza

Rulindo: Abafite isoni zo kugaragaza ihohoterwa bakoresha amarenga

Yanditswe kuya 28-11-2016 saa 06:30' na Nsengimana Evariste


Abaturage bo mu Murenge wa Tumba, mu Karere ka Rulindo, bavuga ko binyuze mu mugoroba w’ababyeyi, bahura bakaganira ku bibazo byugarije imiryango yabo maze n’abakorerwa ihohoterwa bakabivugira mu ruhame, abafite isoni no kwitinya bo bagakoresha ibimenyetso rikamenyekana.

Aba baturage ngo bafite agaseke bashyiramo amababi y’ibiti, impeke (zigaragaza ihohoterwa rishingiye ku mutungo), amarenga baba bayaziranyeho ku buryo biborohereza kumenya uhohoterwa maze bagasura urwo rugo bakaruganiriza.

Hategekimana Théoneste wiyise Farasiya (izina ry’umugore we kuko babanye neza), umwe mu baturage bo mu Kagari ka Nyirabirori, muri uyu murenge, yitangira ubuhamya bw’ukuntu yakoreraga ihohoterwa umugore we, avuga ko gukoresha amarenga ari ukugira ngo ufite isoni zo kuvugira mu ruhame ko akorerwa ihohoterwa abona uburyo bwiza bwo kubigaragaza.

Yagize ati “Buri hohoterwa tuba twarihaye ibisobanuro by’utubabi n’ibindi bikoresho twifashisha. Iyo turangije kubikusanya turebera hamwe ihohoterwa dufite. Impamvu tubishyira mu marenga, hari abantu batinya kubivugira mu ruhame ariko iyo tubikoresheje mu bimenyetso ubona n’ihohoterwa rishingiye ku gitsina rigaragaye.”

Yavuze ko nyuma yo kubona ibyo bibazo, ngo basura abahuye n’icyo kibazo bakabaganiriza mu ngo zabo.

Ati “ Kugira ngo bature bavuge, dusaba uwahuye n’ikibazo akareba umuntu yiyumvamo akamutuma tukamusura mu rugo bitewe n’uko twabipanze.”

Avuga ko ubu buryo butuma babasha kumenya ihohoterwa ryiganje mu murenge wabo ku buryo biborohera kurikemura.

Agaruka ku kibazo cy’ihohoterwa ubwo hatangizwaga iminsi 16 yo kurwanya ihohoterwa rishingiye ku gitsina ku rwego rw’igihugu, Minisitiri w’Uburinganire n’iterambere ry’Umuryango, Nyirasafari Esperance, yavuze ko umuntu akwiye gutinyuka akabivuga bakarenga imvugo yo kwanga kwiteranya. Yatanze urugero ku bana bahohoterwa imiryango yabo ikabihishira, akavuga ko ibyo bihanirwa n’amategeko.

Ati “Hari ihohoterwa dushobora kutamenya mu gihe uwarikorewe atabivuze, icyo gihe aba atiza umurindi ukomeza guhohotera. Baravuga ngo uhishira umurozi akakumaraho urubyaro. Ni bareke kuvuga ngo siniteranye.”

Abaturage bo muri uyu murenge bavuze ko iyo hakoreshejwe amarenga n’abagabo bakorwa ihohoterwa bagatinya kurigaragaza kuko akenshi baba bumva byabasuzuguza uba ari umwanya mwiza wo kubigaragaza.

Hategekimana avuga ko iyo bakoresheje uburyo bw'amarenga n'abatinya kugaragaza ihohoterwa bakorerwa mu ruhame babikora
Hategekimana avuga ko inyigisho yaherewe mu mugoroba w'ababyeyi zatumye ubu abanye neza n'umugore we
Abaturage bo mu Murenge wa Tumba bavuga ko uburyo bw'amarenga mu kugaragaza ihohoterwa bugenda bubafasha
Minisitiri Nyirasafari akangurira abaturage kudahishira ihohoterwa iryo ari ryo ryose

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved