Rulindo: Minisitiri Nsengimana yasabye urubyiruko kwirinda ibitotsi n’ubunebwe

Yanditswe na Kanamugire Emmanuel
Kuya 5 Ugushyingo 2016 saa 02:27
Yasuwe : XX
0

Minisitiri w’Urubyiruko n’Ikoranabuhanga, Jean Philbert Nsengimana yasabye urubyiruko kurushaho kwirinda ibitotsi n’ubunebwe ahubwo bagaharanira gutsinda no kubyaza umusaruro amahirwe Leta y’Ubumwe yabashyiriyeho.

Kuri uyu wa 6 Ugushyingo, iyi Minisiteri yatangije ukwezi k’urubyiruko na gahunda y’Intore mu biruhuko mu Murenge wa Kisaro ho mu karere ka Rulindo, aho abakozi bayo bakoranye umuganda n’urubyiruko ndetse bakubakira n’abatishoboye.

Muri uyu muhango, Minisitiri Nsengimana yasabye urubyiruko gukora cyane babyaza umusaruro amahirwe abari hafi ndetse bakazibukira ibyangiza ubuzima bwabo.

Yagize ati “ Mbere yo kurangamira ibiri kure mureke tubanze tubyaze umusaruro amahirwe atwegereye, ndetse turangwa no kumva ko ibiri imbere ari byo byiza kurusha gucibwa intege n’ibitaraza.”

Yabasabye kugira ubufatanye kuko ari imwe mu myifatire iranga abantu bashaka gutera imbere, aboneraho no gusaba ababyeyi gufasha urubyiruko muri uru rugamba.

Iki gikorwa kandi cyitabiriwe n’urubyiruko rwabashije kugera ku bikorwa by’indashyikirwa, kugira ngo rutange impanuro Abanyarulindo babasha kugenderaho bakabasha kwiteza imbere.

Ukwezi k’urubyiruko guteganyijwemo ibikorwa bitandukanye birimo gushishikariza urubyiruko kurushaho kwiremamo ibyaruteza imbere rukoresha amahirwe rufite.

Uku kwezi gufite Insanganyamatsiko igira iti “ Dukoreshe amahirwe ahari twihangira imirimo.”

Mu gutangiza ukwezi kwahariwe urubyiruko hakozwe umuganda n'ibindi bikorwa byo gushyigikira abatishoboye
Iki gikorwa cyari cyitabiriwe n'abantu benshi batandukanye
Minisitiri w'Urubyiruko n'Ikoranabuhanga, Jean Philbert Nsengimana aganira n'urubyiruko rwa Rulindo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza