Rulindo: Yivuganywe na Polisi ashaka kwica mushiki we

Yanditswe na Uwishyaka Jean Louis
Kuya 9 Ukwakira 2016 saa 11:19
Yasuwe : XX
0

Umugabo witwa Faustin Munyembabazi wari utuye mu Mudugudu wa Gatare, Akagari ka Mukoto, mu Murenge wa Bushoki, Akarere ka Rulindo, yishwe arashwe na polisi y’u Rwanda nyuma yo gushaka kubatema ubwo bari batabaye mushiki we yashaka kwica.

Amakuru aturuka muri aka gace avuga ko Munyembabazi yarashwe mu gitondo cyo kuri uyu wa Gatandatu tariki 8 Ukwakira 2016, nyuma y’uko yari ashatse kwivugana mushiki we witwa Patricie Muhawenimana agakomwa mu nkokora n’abaturage bahise bamuhururiza polisi, ariko mu kuhagera nayo agashaka kuyirwanya ari nabwo yamurasaga akahasiga ubuzima.

Uyu mugabo ngo yatangiye gushaka kwica mushiki we ku wa gatanu, ariko ateshwa n’abaturage ndetse hanashyirwaho irondo ryo kumurarira bakeka ko yabiterwaga n’inzoga, gusa ibi si ko byagenze kuko yabyutse mu gitondo agifite umugambi wo kwivugana umuvandimwe we.

Munyembabazi ngo yabyukanye umuhoro ajya mu rugo rwa mushiki we agezeyo aramubura, ari nabwo yiraraga mu nsina ze ndetse n’iz’abaturanyi akazitemagura.

Nzeyimana Pierre Claver, Umunyamabanga Nshingwabikorwa w’umurenge wa Bushoki, yatangaje ko nyuma y’uko uyu mugabo ashatse gutema abaturage barimo n’abo bafitanye isano bakamubuza, yahise ahindukirana abapolisi bari batabajwe ashaka nabo kubatema, barasa amasasu bamukanga ariko akomeza kubasatira ari bwo umupolisi yahitaga amurasa arapfa.

Nzeyimana avuga ko uyu mugabo w’imyaka 33 n’umugore umwe n’umwana, yari asanganywe umugambi wo kuzica abo bavukana bitewe n’uko ngo bamuragije amatungo akayagurisha, none bakaba bayamwishyuzaga.

Munyembabazi ngo yari amaze iminsi avuga ko azica abavandimwe be bose, agasigaza umwe yavugaga ko azamuraga umwana we. Gusa ngo yashakaga guhera kuri Muhawenimana bitewe n’uko yavugaga ko ari we uyoboye uyu mugambi wo kumwishyuza aya matungo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE