Rusizi: Abacuruzi baciriritse babonye isoko bari barijejwe kuva mu 1985

Yanditswe na Sitio Ndoli
Kuya 11 Nzeri 2017 saa 12:14
Yasuwe :
0 0

Abagore 168 n’abagabo babiri bibumbiye muri Koperative Dushyigikirane icuruzwa ibiribwa byiganjemo imbuto n’imboga mu Kagari ka Shara mu Murenge wa Muganza barashima kuba bibutswe bakabona isoko bari bategereje kuva mu 1985.

Iri soko ryubatswe mu gace uruganda rukora isima rwa Cimerwa mu Karere ka Rusizi.

Bamwe mu batangiranye n’iri soko nyuma y’imyaka itatu uruganda rwa Cimerwa rutangiye gukora mu 1982 bavuga ko inzego za leta icyo gihe hamwe n’ubuyobozi bwa Cimerwa babijeje ko bagiye kububakira isoko bakaruhuka izuba n’imvura byatumaga badacuruza neza.

Mukamazimpaka Josiane yagize ati “Njyewe nari ntuye hano kuva mu 1985, nkazana inyanya ngacuruza n’abandi batangira kuza ariko ubuyobozi bukanyirukaho bakambaza uwambwiye kuhashyira isoko. Abashinwa baje kubaka uruganda maze tubona abakiliya benshi, ubuyobozi bw’icyo gihe bwahise butwemerera ko bugiye kutwubakira isoko ariko reba igihe riziye. Turashima Cimerwa n’akarere kubwo kudutekerezaho.”

Iki gikorwa cyashimishije aba baturage bavuga ko baruhutse imvura n’izuba ryatumaga badacuruza neza, kuri ubu bakaba bemeza ko inyungu mu byo bakora iziyongera cyane.

Niyoyita Josiane ati “Imvura yatunyagiraga kubera ko ari ahantu habi, ibintu byacu bigapfa none baduhaye isoko rishyashya rizatwongerera inyungu mu byo twabonaga kuko ibintu byacu ntibizongera kwangirika.”

Umuyobozi w’Akarere ka Rusizi, Frederick Harerimana, avuga ko ibi babikesha imiyoborere myiza ariko agasaba abaturage kumva ko isoko ari iryabo ku buryo bagomba kuryitaho badategereje inkunga.

Ati “Iri soko dutashye ni ikintu gikomeye cyane kuba abadamu babonye aho bacuruiza heza batanyagirwa ndetse n’ibyo bacuruza bafite isuku, ibi birakomeza gushimangira ibyiza by’imiyoborere myiza y’igihugu cyacu. Icyo dusaba aba baturage ni ukurifata nk’iryabo bakarigirira isuku, ibyo babona bakwifuza kongeramo bakabyongeramo badategereje inkunga.”

Umuyobozi wa Cimerwa, Bekhi Mthembi avuga ko bagomba gukora bashyizemo ingufu kugira ngo abaturiye uruganda barusheho gutera imbere.

Ati “Nka Cimerwa kimwe mu byifuzo dushyiramo ingufu cyane ni uko tugomba gukora ku buryo dufasha abaturage b’aho turi kugira ngo ubuzima bwabo buhinduke bugana aheza, nta na rimwe tuzigera tubatera umugongo igihe muzaba mukeneye inkunga yacu kandi ndizera ko nidukomeza gufatanya uko biri tuzagera ku byiza byinshi kandi n’abana badukomokaho bazabeho neza kuturusha.”

Iri soko rifite imyanya yo gucururizamo 184 aho umwanya umwe ushobora gucururizwaho n’abantu babiri, ryuzuye ritwaye miliyoni 57 z’amafaranga y’u Rwanda yatanzwe n’uruganda rwa Cimerwa.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza