Kwamamaza

Rusizi:Abaturage bateye urugo rw’abashinjwa amarozi barabahondagura

Yanditswe kuya 4-11-2016 saa 13:26' na IGIHE


Umugabo n’umugore bakekwaho kuroga abaturanyi babo, abana n’abazukuru babo, bahondaguwe n’abaturage nyuma yo kwanga kurogora umwe mu bo bashinjwa.

Ubuyobozi bw’uyu Murenge wa Nzahaha mu Kagari ka Kigembe, Umudugudu wa Gihundwe, bwabyukiye mu rugo rw’umusaza n’umukecuru bivugwa ko ari abarozi tariki ya 3 Ugushyingo, nyuma y’aho abaturanyi bari baruteye bashaka kubagirira nabi.

Abaturanyi b’uyu muryango bawushinja kubarogera, harimo umugore w’uwitwa Habimana Damascene. Usibye abaturanyi ngo uyu musaza n’umukecuru ntibarebera izuba n’ababakomokaho.

Umwe mu baturage yagize ati “Mu kuvuka kwanjye numvaga ko uyu musaza n’umukecuru ari abarozi.”

Undi ati “Biyiciye abuzukuru, hari n’imfura yabo bishe. Bishe abana babo babaroga barabamara n’abacu barabica.Ubwo rero ni abicanyi, ni abarozi.”

TV1 dukesha iyi nkuru yavuze ko umuyobozi ushinzwe irangamimerere mu Murenge wa Nzahaha, Bigirimana Theoneste, afatanyije n’abaturage bakuye mu nzu y’uyu musaza n’umukecuru ibintu bitandukanye birimo ibimeze nk’ivu n’ibindi bimeze nka‘vidange’, bababaza ibyo ari byo bo bakavuga ko ari imiti gakondo bavurisha.

Uyu muryango wahakanye ko utaroga maze umukecuru agira ati “Ntabyo nemera ni ukuri kwa nyagasani, uvuga ko ndoga ku giti cye abinyemeze, ariko uwiteka atabunyemeza ndumva nta kibazo nubwo napfa none.”

Nyuma yo gukusanya ibisa n’ivu n’ibindi bimeze nka vidanje, umuyobozi ushinzwe irangamimerere mu Murenge wa Nzahaha yabasabye kurogora uwo bivugwa ko baroze bamubera ibamba, ahita afata umwanzuro wo kubitwika.

Abaturage bamaze kubona ko uyu mukecuru n’umusaza banze kurogora uwo bivugwa ko baroze, bahise batangira kubahondagura ibiti by’imyumbati, bakizwa n’ubuyobozi bwahise bubajyana kuri Sitasiyo ya Polisi ya Gashonga.

Umunyamabanga Nshingwabikorwa w’Umurenge wa Nzahaha, Ingabire Joyeux, yatangarije IGIHE ko icyatumye ubuyobozi bufata icyemezo cyo kujya mu rugo rw’aba bivugwa ko ari abarozi ari impamvu z’umutekano.

Yagize ati “Twari twamenye amakuru y’uko umwuka atari mwiza mu baturage, bituma dufata icyemezo cyo kujya muri ruriya rugo. Nyuma y’ibyabaye ejo ubu tugiye gukorana inama n’abaturage tubahumurize, abavuga ko barozwe na bo tubagire inama yo kujya kwa muganga.”

Magingo aya umukecuru n’umusaza bakekwaho kuroga baracyari mu maboko ya polisi ku mpamvu ngo z’umutekano wabo, mu gihe abo bivugwa ko barozwe na bo bacyirwaye.

Icyaha cyo kuroga giteganywa mu ngingo ya 144 y’igitabo cy’amategeko ahana ibyaha mu Rwanda, aho isobanura ko kuroga ari uguha umuntu ibintu bishobora kwica bwangu cyangwa bitinze, hatitawe ku byakoreshejwe cyangwa uko byahawe nyir’ukubigirirwa n’inkurikizi zabyo. Kuroga bihanishwa igifungo cya burundu.

Umukecuru uryamye bivugwa ko ari umurozi; imyotsi yaturutse ku itwikwa ry'imiti yafatanwe bikekwa ko ari uburozi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved