Rusizi: Ni iyihe mvano y’amacakubiri n’ivanguramoko bivugwa mu itorero Methodiste Libre?

Yanditswe na Uwishyaka Jean Louis
Kuya 16 Ukwakira 2016 saa 08:50
Yasuwe : XX
0

Nyuma yaho bamwe mu bakirisitu bo mu Itorero Methodiste Libre ryo mu Karere ka Rusizi, bavuze ko hagaragayemo amacakubiri, ingengabitekerezo ishingiye ku moko, umuyobozi w’iri torero ku rwego rw’igihugu ndetse akaba n’umuvugizi waryo yatangaje ko nta macakubiri abarangwamo agaragaza imvano y’ibivugwa.

Mu ntangiriro z’uku kwezi nibwo bamwe mu bakirisitu b’iri torero batangaje ko bamwe mu bapasiteri babo babasabye kwitandukanya n’Abatutsi, babyanze birukanwa mu itorero.

Umwe muri bo yagize ati “Nahamagawe mu nama n’umupasiteri, tugeze aho twajyaga kuganirira nahasanze abandi batatu. Banyeretse ko mu Itorero hari abo tugomba kwikiza kugira ngo inyungu zabo bwite zize vuba, bavuga ko tugomba gutizanya imbaraga Abanyamurenge n’Abacitse ku icumu tukabigizayo.”

Itorero riti ’Ntidushobora kubemerera kurwana mu rusengero’

Ubwo yari yagiye mu Karere ka Rusizi gutanga Ubupasiteri, Bishop Kayinamura Samuel, Umuyobozi Mukuru w’Itorero Methodiste Libre mu Rwanda, yavuze ko iki kibazo gishingiye ku kuba barashatse guhuza abaririmbyi mu rwego rwo kugabanya amakorali (chorale), ariko bamwe muri bo ntibabyumve, bituma birukanwa mu nyuma bagenda bavuga ko birukanwe kubera amacakubiri.

Ati “Imyaka nk’ibiri ishize, mu matorero yacu abantu bose baba bashaka kurema za korali ku buryo usanga Paruwasi imwe irimo amakorali nk’umunani. Ufashe izo korali ubutumwa busanzwe ntibwabona umwanya. Twe rero duteganya ko abahuje imyaka bari mu cyiciro kimwe bakwiye kurema korali imwe, urubyiruko rw’abasore n’inkumi aho kuba korali eshatu bagakora imwe n’iyo baba 80, abana bato nabo bakarema korali yabo, nibura buri paruwasi ikagira nk’amakorali atatu.”

Yakomeje agira ati“Korali z’abakuru tuzigezeho dushaka ko bazivanga, korali imwe Sirowamu irimo abo batangaje kuri za televiziyo barabazitira banga kuvanga n’abandi, umwaka urashira tubahendahenda barabyanga, turababwira ngo ubwo mudashaka kuririmbana n’abandi ntacyo bitwaye mugende mwicare mube abakirisitu, aho kugira ngo babyumve batyo batangira kujya kwicara imbere, kurwanya Pasiteri."

Ibyo byatumye ngo bafata umwanzuro wo kubirikuna mu itorero rya Methodiste, bakurikije igitabo cy’Imana n’ikigenga imikorere ya Methodiste.

Ati “Twasanze tutakomeza kubirebera, turabahana tubirukana mu iterero. Nibwo babonye bibakomeranye batangira kuvuga ngo birukanywe kubera amacakubiri mu iterero, ingengabitekerezo n’ivangura ry’amoko, ndababwira ngo bazabijyane aho bashaka hose niba bafite ibimenyetso ariko bareke guteza akavuyo mu rusengero[...] Ntidushobora kubemerera kurwana mu rusengero n’uyu munsi turacyabikomeyeho.”

Bishop Kayinamura avuga ko abirukanywe mu itorero bashobora gusaba imbabazi kugira ngo bemererwe kongera kugira uruhare mu bikorwa by’iri torero.

Bishop Kayinamura (ibumoso) ahamya ko nta macakubiri arangwa mu itorero Methodiste Libre

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza