Rusizi: Ubuhamya bw’abagore bavuye ku ngoyi yo guharikwa no gukubitwa n’abagabo

Yanditswe na Akayezu Jean de Dieu
Kuya 11 Nyakanga 2018 saa 08:50
Yasuwe :
0 0

Abagore bo mu bice bitandukanye by’Akarere ka Rusizi bihana imbibi na Repubulika Iharanira Demokarasi ya Congo, batangaza ko bavuye ku ngoyi yo gukubitwa no guharikwa n’abagabo babo babikesha kujijuka bagana inzira yo gushaka ibibateza imbere.

Batanze ubuhamya ku wa Gatandatu tariki 6 Nyakanga 2018, mu birori byo gusoza ibikorwa by’umushinga Tushiriki Wote wateraga inkunga abagore bakora ubucuruzi buciriritse ku mipaka irimo n’uyu wa Rusizi.

Nikuze Francine ufite umugabo n’abana bane batuye mu mudugudu wa Mpashya mu Kagari ka Kabuye mu Murenge wa Nyakarenzo Akarere ka Rusizi yabwiye IGIHE ko afitanye abana batandatu n’umugabo we ariko ngo uyu bashakanye afite abandi bane yabyaranye n’abandi bagore.

Yavuze ko byaje kugera nyuma agatandkauna nawe kubera inkoni yamukubitaga buri munsi zikiyongeraho ku muca inyuma, ibi kandi ngo byiyongeragaho amafaranga uyu mugore yakoreraga yayazana bakayakoresha andi agahabwa umugabo ngo ajye kunywa inzoga.

Yagize ati “Narayazanaga nkaba nzi ngo uwo munsi ndarya neza n’umugabo icupa ntaribure ngasubira mu isoko n’itike nyigujije”.

Yakomeje avuga ko nyuma yaje guhugurwa n’umushinga Tushiriki Wote abasha kumenya uburyo bwo gukora imirimo y’ubucuruzi buciriritse yiteza imbere asubira no kubana na wa mugabo.

Ati “Umugabo wanjye tubanye neza n’abo bana yabyaranye na bakeba banjye ubu ninjye ubarera kandi nta kibazo na kimwe na za nkoni naraziruhutse umugabo tujya inama”.

Ibi abihuza n’umugabo we uvuga ko bari bamaranye imyaka myinshi babana mu buryo butemewe n’amategeko ariko nyuma yo guhugurwa no gusobanurirwa ibyiza byo kubana, yagiye kwa sebukwe arasaba, arakwa banasezerana imbere y’amategeko kandi bari bamaze kubyarana inshuro enye zose batarasezerana.

Nyirahagenimana Josephine wo mu Murenge wa Mururu yabwiye IGIHE ko kuva yashakana n’umugabo we batigeze bavuga rumwe bitewe n’inkoni yamukubitaga bapfuye kuba umugore ntacyo yinjizaga mu rugo ariko nyuma aza gufashwa na Tushiriki Wote atangira gukorera amafaranga mu bucuruzi bw’imboga none ubu yihesheje agaciro.

Yagize ati “Maze imyaka 20 nubatse urugo ariko imyaka ine niho nanjye mpagaze nk’umubyeyi witwa mutima w’urugo. Nsigaye ndi umugore nanjye wiyumva ko nihesheje agaciro”

Yakomeje avuga ko nyuma yo guhugurwa yatangiye kubitsa amafaranga make agera igihe yavuye mu bukode yiyubakira inzu ayishyiramo amashanyarazi na sima.

Aba bagore bavuga ko muri aka karere bose baramutse bahinduye imyumvire cyangwa bakabona aya mahugurwa abigisha imibanire n’uburyo bwo kwiteza imbere ubuharike, n’andi makimbirane byose byacika i Rusizi.

Nyirahagenimana Josphine avuga ko atagikubitwa n'umugabo kubera kwiteza imbere no kugira uruhare mu guteza imbere urugo
Nyirahagenimana Josephine wari kumwe n'umugabo we yatanze ubuhamya bw'iterambere amaze kugeza ku rugo rwe akesha gufashwa na Tushiriki Wote
Abagore bakoraga ubucurizi bwa forode bambuka imipaka ntabwo bakibikora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza