Rutsiro mu rugamba rushya rwo kurandura ikibazo cy’igwingira ry’abakiri bato

Yanditswe na Mukwaya olivier
Kuya 1 Ukwakira 2017 saa 10:05
Yasuwe :
0 0

Nyuma y’inama yahuje abayobozi bashinzwe ubuzima muri tumwe mu turere tugize Intara y’Iburengerazuba muri Gicurasi uyu mwaka, aka Rutsiro gafatanyije n’abafatanyabikorwa bako kafashe ingamba zo kurandura imirire mibi ikigaragara mu bana bato kifashishije ibijumba bikungahaye kuri vitamini A.

Ubushakashatsi bw’Ikigo cy’Igihugu cy’Ibarurishamibare (NISR) bwakozwe hagati ya 2014 na 2015 bwagaragaje ko ikibazo cyo kugwingira mu bana bari munsi y’imyaka itanu byari ku gipimo cya 44% mu rwego rw’igihugu, mu gihe Akarere ka Rutsiro kaza ku mwanya wa gatatu ku rwego rw’igihugu ku cyegeranyo cya 45.8%.

Ikibazo cy’imirire mibi mu bakiri bato ni kimwe mu byahagurukije inzego ndetse muri uru rugamba Akarere ka Rutsiro kagiye gufatanya n’Umushinga Feed The Future watangijwe n’Umuryango witwa OSEPCCA ukora ibijyanye no kwita ku bidukikije no guhangana n’imihindagurikire y’ikirere uzatanga ubufasha bugamije kurandura icyo kibazo gikunze kugaragara ku bana bari munsi y’imyaka itanu ndetse n’ababyeyi batwite.

Nyiraguhirwa Germaine, umubyeyi utuye mu Murenge wa Kivumu muri Rutsiro yashimiye uruhare rwa leta mu gushaka umuti w’ikibazo cy’imirire mibi ndetse anasaba ubukangurambaga bwo kukirandura burundu.

Yagize ati “Turashima Leta yashyizeho iyi gahunda yaje kudufasha kurandura imirire mibi; ibi bijumba bizadufasha kugabura indyo yuzuye. Ntabwo twari tuzi ko ibi bijumba bifitemo imbere ibara rya Orange tugiye kubihinga kandi bizadufasha.”

Umujyanama wa Komite Nyobozi y’Akarere ka Rutsiro, Uwihanganye Jean Baptiste, yavuze ko hari gahunda nyinshi ziteganyijwe zigamije guteza imbere ubukungu bw’urugo n’imirire myiza.

Yagize ati “Muri aka karere twagaragayeho ikibazo cy’imirire mibi aho mu bushakashatsi bwakozwe mu 2015 twisanze ku mwanya wa gatatu mu gihugu ku gipimo cya 45.8%. Ikibazo cy’abana bafite ikibazo cy’imirire mibi twagihagurukiye dufatanyije n’abafatanyabikorwa kandi tuzabirandura.”

Yakomeje atangaza ko ibi bizagerwaho binyuze mu kurushaho guhugura abajyanama b’ubuzima kugira ngo umwana bimenyekane niba yariye neza.

Umuyobozi wungirije w’Umuryango OSPECCA, Tuyisabe Protais, yavuze ko bafatanyije n’Ikigo gishinzwe guteza imbere ibinyabijumba (CIP), by’umwihariko ibijumba n’ibirayi bateguye iyi gahunda mu rwego rwo kunganira akarere mu rugamba karimo rwo kurandura imirire mibi itera kugwingira.

Yagize ati “Ibi bijumba turabyigisha abaturage tubereka uko bashobora kubihinga bikabafasha mu mafunguro yabo, aho bifite umwihariko wo kuba bikungahaye muri vitamini A. Ntabwo ari ibyo gusa kuko tunigisha abaturage guteka indyo yuzuye kandi aho tubikoreye biratanga umusaruro.”

Umuyobozi ushinzwe Imirire muri CIP, Marie Grace Nkundahombi, yibukije ababyeyi kwita ku bana babo mu gihe cy’iminsi igihumbi babagaburira neza kugira ngo bakure nta kibazo.

Yagize ati “Iyo tuvuze guteza imbere imirire myiza twibanda cyane kuri ya minsi 1000 kuko ariyo fatizo ry’ubuzima bwa muntu iyo atitaweho ntabwo bibasha gukosoka. Niyo mpamvu twibanda ku ngo zirimo abagore batwite n’abana bari munsi y’imyaka itanu cyane cyane abari munsi y’ibiri kuko ariho ya minsi 1000 igera.’’

Iyi gahunda imaze kugera ku bana bagera kuri 200 mu Karere ka Rutsiro n’abandi 200 muri Karongi aho ababyeyi babo bakangurirwa gutera imigozi y’ibijumba mu rwego rwo gushaka inyunganizi bakwifashisha barandura imirire mibi.

Umuyobozi ushinzwe Imirire muri CIP, Marie Grace Nkundahombi, yibukije ababyeyi kwita ku bana babo mu gihe cy'iminsi igihumbi
Abana bahawe ibijumba bikungahaye kuri vitamini A mu rwego rwo guhangana n'imirire mibi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza