Rutsiro: Ubwoba bwo guharikwa butuma abagore bahisha imitungo kandi barasezeranye ivangamutungo

Yanditswe na Tombola Felicie
Kuya 18 Kamena 2018 saa 04:56
Yasuwe :
0 0

Bamwe mu bakobwa batuye mu Murenge wa Manihira, Akarere ka Rutsiro batangaza ko ubuharike bumeze nk’umuco mu bagabo baho butuma iyo bagiye gushyingirwa bagira imitungo basigaza iwabo ntibayereke abagabo.

Itegeko rigenga Imicungire y’Umutungo w’Abashyingiranywe, Impano n’Izungura, rivuga ko Ivangamutungo rusange ari amasezerano abashyingiranywe bagirana, bakumvikana gushyira hamwe umutungo wabo wose, ibyimukanwa n’ibitimukanwa.

Abakobwa bo muri Manihira bavuga ko babizi ariko kubera amakenga yo kwibaza uko bizagenda igihe bazaba batangiye guharikwa, bakabirengaho bagasiga nk’amatungo cyangwa imirima iwabo ku buryo abagabo batazayimenya kugira ngo nibaramuka baharitswe bazirwaneho.

Ubwo Umuryango w’Abanyamakuru baharanira amahoro, Pax Press wabasobanuriraga itegeko rigenga Imicungire y’Umutungo w’Abashyingiranywe, Impano n’Izungura hagamijwe kubaka umuryango uzira amakimbirane, abagore n’abakobwa bo muri Manihira bavuze ko ubuharike butuma banyuranya n’itegeko.

Tuyisiime Beatha w’imyaka 23 yagize ati “Impamvu abakobwa bahisha imitungo kandi basezeranye ivangamutungo rusange si uko tutazi icyo bisobanuye, ni amakenga kuko guharika aha bisa nk’aho ari umuco.

"Umukobwa yanga gusazira iwabo ariko atanizeye ko umugabo we atazamuharika, bigatuma atamwereka byose kugira ngo najyana ibyo bakoreye mu zindi ngo na we azagire icyo aheraho yiyubaka.”

Uwayezu Clementine w’imyaka 24 yagize ati “ Sinzi impamvu inaha abagabo bakunda guharika abagore babo kandi baranasezeranye byemewe n’amategeko, usanga umwe iyo abikoze n’abandi babifata nk’ubutwari. Bituma abakobwa bagira utwo bisigira iwabo kandi barasezeranye ivangamutungo rusange kuko banga ko imitungo yabo izajya gutunga izindi ngo zo kwa mukeba”.

Bavuga ko imitungo bakunda guhisha ari amatungo magufi n’imirima kandi bakemeza ko babishyigikirwamo n’ababyeyi babo.

Avuga impamvu ababyeyi babishyigikira, Ayinkamiye Josephine umubyeyi w’imyaka 49 yagize ati “Iyo umukobwa bamuharitse usanga asubira iwabo akaba aribo bamutunga cyangwa bakajya bamwoherereza ibimutunga. Hari ubwo rero bamugira inama yo gusiga bimwe kugira ngo bizamurwaneho nibamuharika kuko ino aha si igitangaza.”

Umuyobozi ushinzwe imibereho myiza y’abaturage mu Murenge wa Manihira, Nshimiyimana Honoré, yemeza ko guharika bihari gusa agasaba abaturage kubireka.

Ati “Mu mibereho myiza y’abaturage nshinzwe, ibibazo byinshi twakira biba bifitanye isano n’ubuharike, ugasanga umugabo afite abana iwe, hari nabo yabyaye ahandi atababonera ibyo bakeneye kandi abafiteho inshingano bigateza ibibazo.”

Yongeyeho ati “Icyo twifuza ni uko ubuharike bwacika, abantu iwabo mu muryango bakaganira bagakemura ibibazo aho kumva ko gushaka undi mugore ku ruhande byakemura ibibazo wagiranye n’uwo mwasezeranye.”

Guhisha umutungo uwo mwashakanye amategeko abivugaho iki?

Umunyamategeko Nizeyimana Elie avuga ko ari ikosa kuba uwasezeranye ivangamutungo rusange yahisha mugenzi we umutungo runaka.

Ati “Ibyo ni ikosa kuko iyo bakimara gushyingiranwa imbere y’amategeko ivangamutungo rusange, imitungo yose yaba yimukanwa n’itimukanwa umwe yari afite mugenzi we ayigiraho ububasha.”

Yongeyeho ko igihe bigenze gutyo umwe akaba yakwitaba Imana hari ibyo atagaragaje biribwa n’uwari ubimuragiriye kandi asize abana byakagiriye akamaro.

Atanga inama ko igihe umwe mu bashakanye abona ikibazo mu micungire y’umutungo, babyumvikanaho bakagana urukiko bagasaba ubundi buryo bw’imicungire y’imitungo, nk’Ivangamutungo muhahano n’ivanguramutungo risesuye, butuma umwe hari ibyo yakwigenzuraho aho gukora ibibujijwe n’amategeko.

Umunyamategeko avuga ko ingorane ziri mu guhisha umutungo ku basezeranye ivangamutungo rusange, ari uko habamo kutizerana, umwe akaba yashinja undi ubujura kuko ashobora kumubonana ibyo atari amuziho, ndetse hakaba havamo n’impamvu zo gutandukana igihe umwe aketse ko undi abikomora mu kumuca inyuma.

Abantu bari baje ku bwinshi gusobanurirwa ku bijyanye n'Itegeko rigenga Abashyingiranywe, Impano n'Izungura
Nshimiyimana Honoré ushinzwe imibereho myiza y’abaturage mu Murenge wa Manihira
Uwayezu Clementine w’imyaka 24 utuye Manihira yemeza ko guhisha imitungo ari uburyo bwo kwirengera

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza