Rwamagana: Abiga muri Collège Marie Reine bahawe umukoro mu kubaka u Rwanda ruzira amacakubiri

Yanditswe na IGIHE
Kuya 6 Kamena 2019 saa 09:20
Yasuwe :
0 0

Abanyeshuri biga muri Collège Marie Reine de la Paix Rwamagana, ishuri riherereye mu Karere ka Rwamagana basabwe gushishoza mu byo bakora byose kugira ngo u Rwanda rutazasubira mu mateka mabi ya Jenoside rwanyuzemo.

Babisabwe kuri uyu wa Gatatu ubwo iryo shuri ryibukaga ku nshuro ya 25 Jenoside yakorewe Abatutsi muri Mata 1994.

Nyuma yo gusura urwibutso rwa Rwamagana, bagasobanurirwa amateka yaranze Jenoside bakanashyira indabyo ku mva zishyinguyemo imibiri y’abazize Jenoside, abanyeshuri biga kuri iryo shuri, abarezi n’abandi bayobozi batandukanye baje kwifatanya nabo bahawe ibiganiro byibanze ku mugambi w’itegurwa n’ishyirwa mu bikorwa rya Jenoside yakorewe Abatutsi, uko yahagaritswe n’Ingabo zari iza FPR Inkotanyi ndetse n’inzira yo kongera kwiyubaka kw’abanyarwanda.

Hakizimana Polycalype, umwe mu batanze ikiganiro yavuze ko Jenoside yakorewe abatutsi yasenye bikomeye igihugu ariko agaragaza ubutwari bw’ingabo zari iza FPR Inkotanyi zigahagaritse Jenoside.

Yavuze ko nk’abakiri bato bakwiriye kwigira kuri ubwo butwari, agaharanira ko ibyabaye bitazongera.

Umuyobozi w’icyo kigo, Sr Valerie Nyiransabimana yavuze ko bateguye igikorwa cyo kwibuka kugira ngo bigishe urubyiruko rutanyuze mu mateka mabi yaranze u Rwanda kugira ngo aho bari hose bajye birinda icyasubiza igihugu muri iryo curaburindi.

Yagize ati “ Dufata umwanya nk’uyu ngo tubyigishe urubyiruko, amateka yaranze igihugu cyacu bayabemo bayazi, bayubakireho bakora ibifatika byubaka igihugu. Iyo urebye mu biganiro cyangwa mu masomo hari ibyo ubona baba batumva, n’uyu munsi byagaragaye. Biba byiza iyo ufashe umwanya ukabasobanurira uko byagenze”.

Birungi Spéciose wiga mu mwaka mu gatandatu mu Ishami ry’Imibare, Ubutabire n’ibinyabuzima (MCB), yavuze ko bungukiye byinshi mu byo basobanuriwe.

Yagize ati “Umusanzu wacu nuko duharanira ko ibyabaye bitazongera uko dushoboye kose. Icyo ngiye gukora ni ukurwanya ingengabitekerezo mbi kandi nkasangiza abandi amateka, aho ndi nkaharanira ko nta macukubiri ahaba”.

Umunyamabanga Nshingwabikorwa w’Umurenge wa Kigabiro, Egide Hanyurwimfura yavuze ko kwigisha amateka urubyiruko ari ukurwanya igishobora kongera gucamo ibice abanyarwanda.

Perezida wa Ibuka mu Karere ka Rwamagana, Dative Musabyeyezu yavuze ko amateka mabi yaranze u Rwanda adashobora gukosorwa urubyiruko rudasobanuriwe neza uko byagenze.

Yavuze ko kumenya neza amateka k’urubyiruko ari inshingano z’abakuze kuko ari wo musingi wo kwizera ejo heza h’igihugu.

Ati “Abakuru nitwe twangiza abatoya, turasabwa gufasha urubyiruko muri iri koranabuhanga, tubafashe tubibanemo be kurijyamo bonyine kuko iyo ari bonyine ntibabona uwo bazabaza bya bibazo. Barasabwa gushishoza, bagasobanuza kandi bagabwa umwanya wo gusobanukirwa.”

Mu banyeshuri b’abakobwa 350 biga muri Collège Marie Reine de la Paix Rwamagana, umukuru muri bo afite imyaka 19, bivuze ko bose bavutse nyuma ya Jenoside yakorewe Abatutsi.

Abanyeshuri ba Collège Marie Reine de la Paix Rwamagana bashyize indabyo ku rwibutso rwa Rwamagana
Hacanywe urumuri rw'icyizere rushushanya ko ejo h'u Rwanda ari heza
Perezida wa Ibuka mu Karere ka Rwamagana, Dative Musabyeyezu yavuze ko amateka mabi yaranze u Rwanda adashobora gukosorwa urubyiruko rudasobanuriwe neza uko byagenze
Abiga muri Collège Marie Reine de la Paix Rwamagana bakinnye umukino ugaruka ku mateka ya Jenoside yakorewe Abatutsi
Birungi Spéciose wiga mu mwaka mu gatandatu mu Ishami ry’Imibare, Ubutabire n’ibinyabuzima (MCB), yavuze ko bungukiye byinshi mu byo basobanuriwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza