Rwamagana: Umugore arakekwaho kwicisha umugabo amuziza ko yabyaye hanze

Yanditswe na Philbert Girinema
Kuya 1 Ukuboza 2016 saa 09:37
Yasuwe : XX
0

Mu Ntara y’Iburasirazuba mu Karere ka Rwamagana, umugore afunzwe akekwaho kugira uruhare mu iyicwa ry’umugabo we w’imyaka 52 bapfa umwana yari yarabyaye hanze.

Uwo mugore ufungiye kuri Sitasiyo ya Nzige mu Karere ka Rwamagana yafashwe mu ijoro ryakeye ubwo hari hamaze kumenyekana amakuru y’urwo rupfu rw’umugabo we Ndabateze Mathias w’imyaka 52 wari utuye ku Muyumbu, urupfu rwe rwamenyekanye mu ma saa tatu z’ijoro ubwo uyu mugore we yajyaga gutabaza.

Umuvugizi wa Polisi muri iyo Ntara IP Emmanuel Kayigi yatangarije RBA ko uwo mugore ari we wagiye gutabaza ariko hari ibimenyetso bimuhamya urwo rupfu.

Ati “Yavuze ko hari abantu bateye urugo bakaza bakica umugabo we akavuga ko abaciye mu myanya y’intoki akabatoroka, ko atabashije kubamenya.”

Abantu ngo bahise bajya kureba ikibaye basanga umugabo w’uwo mugore wari ufite imyaka 52 yishwe akubiswe ibintu ndetse yatewe n’icyuma mu ijosi.

Ati “ Byabaye ngombwa ko abantu koko bajyayo bahuruye basanga uwo muntu yitabye Imana ariko mu iperereza polisi yabashije gukora, icyagaragaye ni uko umugore yabigizemo uruhare n’ubwo ingufu zakoreshejwe utakwemeza ko ari we wamwiyiciye.”

“Bamuteye icyuma ku ijosi, ndetse banamuhondagura ubuhiri mu mbavu ku buryo byagaragaraga ko bazihwanyije.”

IP Kayigi yakomeje avuga ko iperereza rikomeje ariko ikigaragara ari uko abantu bashobora kuba bamwishe bafatanyije n’uwo mugore, waje no kwemera urupfu rwe.

Ati “ Icyagaragaraga ni uko yavugaga ko yabaciye mu myanya y’intoki , yakwereka aho yanyuze ukahabura, ikindi ngo ntiyigeze avuza induru ahubwo ngo yarenze ingo enye ajya gutabaza urwa gatanu avuga ko abantu babateye kandi bishe umugabo we.”

Polisi yemeza ko iperereza ryerekanye ko urwo rupfu ari umugambi bigaragara ko wateguwe, cyane ko ejo uwo mugore yari yiriwe asangira n’umugabo we bonyine. Ikindi ngo ni uko yakuruwe ajyanwa mu cyumba ndetse hakanakuburwa mu rwego rwo gusibanganya ibimenyetso.

Kugeza ubu ngo hari abantu babiri batawe muri yombi, uwo mugore avuga ko bashobora kuba bafatanyije, ariko polisi ishidikanya ku ruhare rwabo muri urwo rupfu.

Ati “Hari abandi bantu babiri batawe muri yombi avuga, ariko tutashingiraho cyane ngo tuvuge ko aribo bafatanyije, kuko mu iperereza dukomeza gukora bigaragara ko icyo acyiduhisha, kuko abo bantu bivugwa ko hari amakimbirane bari basanzwe bafitanye n’uwo mugore, barahakana.”

“Iperereza rishobora kugaragaza ko ari bo cyangwa hari abandi ariko ikiriho ni uko dufite nyirabayazana w’urupfu, twizera ko byanze bikunze baba abo cyangwa abandi batarafatwa bashobora kuba bari hanze bazamenyekana.”

Urwo rupfu ariko ngo rushobora kuba rushingiye ku makimbirane yo mu muryango ukurikije iperereza.

IP Kayigi ati “Uru rupfu rushobora kuba rushingiye cyane ku makimbirane yo mu ngo, kuko umugabo yari afite umwana yabyaye hanze, kandi byari bimaze iminsi ari amakuru ari kuva mu baturage bavuga ko umugabo yababwiraga ko yari yaguze mitiweli y’uwo mwana ufite imyaka 15, kandi ko atamuvugagaho rumwe n’umugore kuko ashaka kumwandikisha nawe akajya mu bandi bana 8 bafite, ariko umugore akaba atabyemeraga neza.”

Umuvugizi wa Polisi mu Ntara y'Iburasirazuba, IP Emmanuel Kayigi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza