Kwamamaza

Rwamukwaya yakebuye abarimu bahanisha abanyeshuri ibihano bibabaza umubiri

Yanditswe kuya 24-10-2016 saa 11:36' na Emma-Marie Umurerwa


Umunyamabanga wa Leta muri Minisiteri y’Uburezi, ushinzwe amashuri y’imyuga n’ubumenyingiro, Rwamukwaya Olivier, yakebuye abarimu bahanisha abanyeshuri inkoni ababwira ko iyo atari imyitwarire ikwiye kuranga umuntu wize.

Ubu butumwa yabutanze ashingiye ku nkuru y’umwarimukazi wo ku kigo cy’amashuri abanza cya Nyundo, mu Murenge wa Rongi, mu Karere ka Muhanga, wakubise umunyeshuri, akamena ijisho rya mugenzi we.

Tariki 7 Nzeri 2016 nibwo Nyiransabimana Françoise w’imyaka 23 wigishaga mu mwaka wa gatatu w’amashuri abanza yakubise umunyeshuri wari wakoze amakosa, inkoni irasaduka, akabaru kagwa mu jisho ry’umwana w’umukobwa wari inyuma ye rirameneka, aza kujyanwa kwa muganga barikuramo.

Rwamukwaya yatangarije abitabiriye ibirori by’uyu munsi Mpuzamahanga ko umwarimu mwiza atari uwo abanyeshuri batinya ko ari bubakubite, cyangwa ari bubahane mu buryo ubwo ari bwo bwose.

Yagize ati “Imyumvire yo kumva ko igisubizo cy’uko abanyeshuri bubaha mwarimu, bitwara neza mu ishuri ari inkoni, icyo ntabwo ari icy’umuntu wize uburezi.”

Yakomeje agira ati “Umwarimu mwiza ni inshuti y’abanyeshuri kandi ubwo bucuti ntibukuraho kubashyiraho igitsure. Niba hari n’abigeze kujya bakoresha inkoni iyo ukurikiranye neza usanga batarize ibijyanye n’uburezi nk’uko mwebwe muteraniye aha mwagize amahirwe yo kubyiga.”

Rwamukwaya avuga ko hari ubundi buryo umwarimu yahana umunyeshuri adakoresheje inkoni.

Ati “Hari uburyo bwinshi twagiye duhugurwamo aho twagiye twiga yaba mu mashuri nderabarezi no muri za kaminuza n’ahandi dushobora kwifashisha tutakoresheje bya bihano bibabaza umubiri.”

Rwamukwaya yibukije abarimu ko gukubita no gukomeretsa bihanwa n’amategeko y’u Rwanda, kandi ko bitabujijwe gusa mu mashuri, ahubwo nta n’ahandi byemewe mu gihugu kuko ni kimwe mu byaha bihanirwa.

Ati “Inkoni ivuna igufa ntivuna ingeso. Umuntu ntiyamenya ngo igipimo washyiraho ni umunyafu ungana ute, upima ibiro bingahe wakwemerwa, wapima imbaraga ki umwarimu akwiriye gukoresha igihe agiye kuwukoresha ko abantu bagira n’imbaraga zitandukanye n’umujinya ushobora kuba utangana.”

Mu butumwa bwe yasoje asaba abarimu kudakubita abanyeshuri, ahubwo bagakoresha uburyo butandukanye bwo guhana bahuguwemo.

Umunyamabanga wa Leta muri Minisiteri y’Uburezi, ushinzwe amashuri y’imyuga n’ubumenyingiro, Rwamukwaya Olivier, yasabye abarimu gucika ku muco wo guhanisha abanyeshuri inkoni

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved