Sano James na Kamanzi bamaze gushyikirizwa ubushinjacyaha

Yanditswe na IGIHE
Kuya 12 Nzeri 2017 saa 08:25
Yasuwe :
11 4

Polisi y’Igihugu yatangaje ko yamaze gushyikiriza ubushinjacyaha dosiye zikubiyemo ibyaha bishinjwa Sano James wahoze ayobora Wasac na Kamanzi Emmanuel uyobora EDCL bombi bashinjwa gutanga amasoko ya leta mu buryo bunyuranyije n’amategeko.

Ku wa Kane Nzeri 2017 nibwo byatangajwe ko Polisi yataye muri yombi Sano James wahoze ari Umuyobozi w’Ikigo cy’Igihugu gishinzwe amazi n’isukura, Wasac, na Kamanzi Emmanuel uyobora EDCL aho bakurikiranyweho ibyaha bifitanye isano no gutanga amasoko ya leta mu buryo bunyuranye n’amategeko.

Icyo gihe Polisi y’Igihugu yatangaje ko Sano yatawe muri yombi akurikiranyweho ibyaha bifitanye isano no gutanga amasoko ya leta mu buryo bunyuranyije n’amategeko kandi bibujijwe n’ingingo ya 628 y’igitabo gihana ibyaha mu Rwanda.

Iperereza rya Polisi ngo ryagaragaje ko uyu mugabo yatanze mu buryo bunyuranyije n’amategeko isoko rya miliyoni 61 ariha ikigo Cerrium advisory Ltd. Iri soko ryari rigamije gutegura no gukoresha ibizamini abakozi bashya.

Yanatanze binyuranyije n’amategeko isoko ryo kubaka uruganda rw’amazi i Kayenzi mu Karere ka Kamonyi rifite agaciro ka miliyoni 371 Frw, ritangwa hatabayeho kugaragaza ibizakenerwa muri icyo gikorwa ari nabyo bishingirwaho mu kugena ibiciro ku bapiganira isoko.

Mu kiganiro IGIHE yagiranye n’Umuvugizi wa Polisi y’Igihugu, ACP Theos Badege, yatangaje ko Sano James na Kamanzi Emmanuel hamwe n’abantu babiri baregwa hamwe (umwe kuri buri ruhande) bamaze gushyikirizwa ubushinjacyaha kugira ngo bagezwe imbere y’ubutabera bisobanure ku byo bashinjwa.

Polisi ivuga ko Kamanzi yatanze mu buryo bunyuranyije n’amategeko isoko ry’ibihumbi 45 by’amadolari ryo kugura ‘transformateur’ icumi n’iryo kugura ibyuma 400 by’amashanyarazi (electric poles) rifite agaciro k’ibihumbi 280 by’amadolari ya Amerika. Iperereza rikaba rikomeje ku byaha bombi bashinjwa.

Nyuma y’itabwa muri yombi ry’aba bayobozi, Minisiteri y’Ibikorwa remezo igenzura ibigo bahagarariye, yahise ikorana inama z’igitaraganya n’abakozi babyo basabwa kugendera kure amakosa nk’aya ahombya leta agatuma abaturage batakariza icyizere inzego ziba zarashyizweho.

Sano James (ibumoso) na Kamanzi Emmanuel (iburyo) batawe muri yombi ku wa 2 Nzeri 2017

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza