Kwamamaza

Sarah Zeid, Igikomangomakazi cya Jordania yemeye gucanira inkambi z’impunzi

Yanditswe kuya 25-10-2016 saa 12:49' na Mukaneza M. Ange


Mu ruzinduko agirira mu Rwanda, Sarah Zeid, igikomangomakazi cya Jordania yasuye inkambi ya Mahama kuri uyu wa Kabiri tariki ya 25 Ukwakira 2016 avuga ko agiye kureba uburyo impunzi z’Abarundi n’Abanyecongo zacanirwa.

Uru ruzinduko rugamije kugirana ibiganiro n’abayobozi b’u Rwanda n’impunzi ubwazo ku mibereho zifite n’uburyo yarushaho kunozwa.

Sarah Zeid yasuye iyi nkambi ari kumwe na Minisitiri ushinzwe gukumira Ibiza no kwita ku mpunzi, Seraphine Mukantabana, Dr Azam Saber, Umuyobozi w’Ishami ry’Umuryango w’Abibumbye ryita ku Mpunzi (UNHCR) mu Rwanda na Volker Türk, Komiseri Mukuru Wungirije wa HCR ku rwego rw’Isi.

Akigera muri iyi nkambi icumbikiye impunzi z’Abarundi, Sarah Zeid yagiye yinjira mu nzu ku yindi areba imibereho yazo.

Yanaganiriye n’abana bahunze batari kumwe n’imiryango yabo ku mibereho bafite ahanini ishingiye ku myigire.

Sarah Zeid yavuze ko yashimishijwe n’uburyo u Rwanda n’abanyarwanda bakiriye impunzi ziba ku utaka bwabo, ndetse ko nyuma yo gusura inkambi ya Mahama icyo agiye yiyemeje ari ukubashakira uko bahabwa umuriro.

Ati"Birashimishije kubona impinduka zigenda zigerwaho muri iyi inkambi. Nashimishijwe no kubona imishinga bakomeje gukora. Kimwe mu bibazo nzajyana ni ugucanirwa ku mpunzi z’Abarundi n’Abanyecongo."

Yakomeje avuga ko umuriro ari ingenzi cyane kuko bizatuma impunzi n’abaturage begereye inkambi barushaho gukora cyane, kwiga neza no kwizera umutekano wabo igihe hari umwijima.

Sarah usanzwe ukorana na Loni mu bijyanye n’imibereho y’ababyeyi n’abana yavuze ko yumvise ibibazo impunzi ziri mu Rwanda zifite bityo akaba agiye kurushaho gukora ubuvugizi.

Umuyobozi mukuru wungirije ushinzwe kurengera impunzi uri HCR, Volker Türk yavuze ko bahizemo gusura impunzi ziri mu Rwanda kugira ngo isi ikanguke itangire kwita no kuri Afurika.

Ati"Iyo turebye ku kibazo cy’impunzi ku Isi, dusanga ikibazo cy’impunzi muri Afurika kititabwaho uko bikwiye. Hari ukwitabwaho kw’ikibazo cy’impunzi mu Burasirazuba bwo hagati, Afghanistan. Nizeye ko uruzinduko rwacu ruzatuma ikibazo cy’impunzi hano kimenyekana n’ibyo bakeneye cyane bikitabwaho."

Minisitiri Mukantabana na we yavuze ko uru ruzinduko rufite byinshi ruvuze kuko bituma isi imenya ibibazo impunzi zifite kandi u Rwanda rwonyine rukaba rutashobora kubikemura byose.

Aba bayobozi basuye inkambi ya Gihembe mu karere ka Gicumbi ibarizwamo Abanyecongo, ejo hashize.

Kugeza ubu Inkambi ya Mahama ibarizwamo impunzi z’Abarundi bagera ku bihumbi 51.

Igikomangomakazi, Sarah Zeid(hagati),akigera mu nkambi ya Mahama
Sarah Zeid ateruye umwana mu nkambi ya Mahama
Sarah n'abandi bayobozi muri HCR bakina n'impunzi
Minisitiri ushinzwe kwita ku mpunzi no gukumira ibiza na we ntiyatanzwe mu kibuga
Abayobozi bakinnye Basketball n'abana bo mu nkambi ya Mahama
Azam Saber, uhagarariye UNHCR mu Rwanda, Volker Turk, Sarah Zeid na Mukantabana Seraphine
Sarah Zeid aganira na bamwe mu bana bahunze batari kumwe n'ababyeyi babo
Sarah yasobanuriwe bimwe mu bikorwa abagore bo mu nkambi ya Mahama bakora

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved