Kwamamaza

Ab’i Save ahakomoka Gitera na Sindikubwaho biyambuye isura basigiwe n’ibihangange mu ivangura

Yanditswe kuya 10-10-2016 saa 07:46' na Prudence Kwizera


Abaturage bo mu Murenge wa Save, mu Karere ka Gisagara bavuga ko biyemeje gushyira hamwe bakora ibyiza kandi batoza abato umuco wo gukundana bagamije guhindura amateka mabi basigiwe n’ibihangage mu bibi bizwiho kubiba urwango mu Banyarwanda.

Ubwo basozaga icyumweru cy’Ubumwe n’Ubwiyunge batangiye tariki ya 1 bakagisoza ku ya 7 Ukwakira 2016, hakomojwe ku mateka yaranze Save ahakomoka Théodore Sindikubwabo wayoboye Leta yiyise iy’abatabazi, yabibye amacakubiri mu baturage na Joseph Gitera Habyarimana washinze ishyaka APROSOMA akanashyiraho amategeko 10 y’Abahutu.

Amateka y’u Rwanda agaragaza ko Sindikubwabo ari we watangije Jenoside yakorewe Abatutsi mu yahoze ari Perefegitura ya Butare, naho Gitera aba ku isonga mu babibye urwango mu Banyarwanda.

Urugero ni aho mu mategeko 10 y’Abahutu hari aho Gitera yagize ati “Umubano w’Umututsi n’Umuhutu ni umufunzo ku kuguru, ni umusundwe ku mubiri, ni umusonga mu rubavu.”

Bimwe mu bikorwa bishimangira Ubumwe n’Ubwiyunge Abanye-Save bakoze muri iki cyumweru, harimo gufasha abatishoboye no gukusanya amafaranga arenga miliyoni ebyiri yo gusana urwibutso rwa Jenoside yakorewe abatutsi rw’Umurenge wa Save.

Umunyamabanga Nshingwabikorwa w’Umurenge wa Save, Innocent Kimonyo, yagaragaje ko ibyo bagenda bigezaho byose babikesha gukorera hamwe.

Kimonyo ati “Muri iki cyumweru twahariye Ubumwe n’Ubwiyunge, abaturage bitangiye miliyoni ebyiri n’ibihumbi 500 n’amafaranga 200 (2.500.200 Frw), asanga ayo batanze ubushize miliyoni zigera kuri eshanu, yose amaze kuba miliyoni zirindwi zirenga. Hari ibindi bakoze, aho bubakiye abaturage bagera kuri bane, inzu zigiye kuzura kandi hari n’izindi batangiye.”

Hagaragajwe ko gusana urwibutso rwa Jenoside rwo mu Murenge wa Save bisaba amafaranga agera kuri Miliyoni 25, bityo abaturage batuye uyu murenge biyemeje gushyiraho uruhare rwabo, inkunga y’Akarere n’abandi bafatanyabikorwa ikazaza isanga hari icyo na bo bakoze.

Reverien Maniraho utuye mu Murenge wa Save, avuga ko Jenoside ikimara guhagarikwa babagaho bishishanya n’abaturanyi babo, ariko biza kugenda bishira bitewe n’inyigisho nziza bahabwaga n’ubuyobozi.

Ati “Hagiye habaho inyigisho n’ibiganiro, buhoro buhoro abantu bakagenda bahura, ndetse habayeho n’amatsinda, nk’ubu hari itsinda rihuje abacitse ku icumu n’abireze bakemera ibyaha, ubu barahura bakungurana ibitekerezo byubaka, ubu rero twavuga ko tugeze ahantu hashimishije.”

Umuyobozi w’Akarere ka Gisagara, Jérôme Rutaburingoga, yibukije Abanye-Save ko ibyiza bamaze kugeraho birimo ubufatanye n’ubwumvikane biva kure, bityo abasaba kubisigasira no kubera abandi urugero rwiza.

Rutaburingoga ati “Gisagara tuva kure, uhereye na hano i Save kuri ba Gitera bahimbye amategeko mabi yo kuvangura abanyarwanda. Abashyize hamwe nta kibananira, ubwo bumwe niryo banga, iyo nzira nziza mugomba kuyikomeza, kuko iterambere no kwesa imihigo twiyemeje ntitwabigeraho nta bumwe.”

Mu gusoza icyumweru cy’Ubumwe n’Ubwiyunge, abatuye i Save bifatanyije n’ubuyobozi bishimira ko umurenge wabo wahize indi yose yo mu Karere ka Gisagara mu kwesa neza imihigo, biyemeza gukomeza kuba ku isonga.

Abayobozi b’utugari tugize uyu murenge baboneyeho n’umwanya wo gusinyana n’umurenge imihigo mishya biyemeje kuzesa.

Ibi birori bikaba byasojwe abaturage n’abayobozi bakora imyitozo ngororamubiri mu rwego rwo gusabana no guharanira ubuzima bwiza buzira umuze.

Save kandi yishimiye igikombe yahawe kuko yahize indi mirenge mu kwesa imihigi muri Gisagara
Abayobozi b'utugari bashyize umukono ku mihigo bahigiye kuzesa
Iki cyumweru cy'ubwiyunge cyaranzwe n'ibyishimo bagaragaza ko bashyize hamwe
Abayobozi n'abaturage bafatanyije mu gikorwa cyo gukora imyitozo ngororamubiri mu rwego rwo kurwanya indwara

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved