Ababyeyi basabwe gushakira abana ibitabo aho kubagurira Chocolat

Yanditswe na Ishimwe Israel
Kuya 19 Ugushyingo 2016 saa 12:23
Yasuwe : XX
0

Umuryango Mpuzamahanga wita ku bana ku Isi, Save the Children, uvuga ko ababyeyi benshi usanga barushaho kugurira abana babo za Chocolat n’ibindi bintu byo kurya ariko ntibibuke kubagurira ibitabo kandi ari kimwe mu bibafasha gukurana ubumenyi n’umuco wo gusoma.

Save the Children ivuga ko muri raporo yakoze mu mwaka wa 2011 yasanze abanyeshuri bo mu mwaka wa Kane no mu wa Gatandatu w’amashuri abanza badafite ubuhanga mu gusoma neza no kwandika Ikinyarwanda kiri ku rugero rwo mu mwaka wa Kabiri n’uwa Gatatu.

Yagaragaje kandi ko 13% y’abana biga mu mwaka wa Kane w’amashuri abanza baba badafite ubushobozi bwo gusoma neza Ikinyarwanda cyigishwa mu mwaka wa kabiri no mu wa Gatatu, mu gihe abandi 13% badashobora gusoma neza amagambo 15 mu munota umwe.

Abagera kuri 40% y’abanyeshuri biga mu mwaka wa Kane w’amashuri abanza batabasha gusubiza neza ibibazo bijyanye n’ibyo baba bamaze gusoma mu mwandiko.

Ibi byagarutsweho kuri uyu wa Gatanu tariki ya 18 Ugushyingo, ubwo uyu muryango watangizaga ubukangurambaga wise ‘Chocolate book’, mu rwego rwo gushishikariza ababyeyi kurushaho kugurira abana ibitabo byo gusoma nk’uko babagurira n’ibindi baba bakeneye.

Umuyobozi ushinzwe ibitabo mu mushinga witwa ‘ Mureke dusome’ ukorera muri Save the Children, Catherine Uwimana, yavuze ko kwigisha umwana gusoma akiri muto ari intambwe imufasha gutuma ubwonko bwe butera imbere kurusha ubw’abadasoma.

Ati “Ubushakashatsi bwerekana ko iyo umwana asoma cyane bituma agira ubuhanga bwo gutekereza akiri muto, bigatuma asobanukirwa Isi atuyemo dore ko ibintu byinshi tubisanga mu byanditse, bituma rero amenya uko ahandi bimeze, bugaragaza kandi ko abana bamenya neza gusoma no kwandika ururimi kavukire bituma iyo bakuze biborohera kwiga izindi ndimi zo hanze.”

Mu gihe byakunze kugaragara ko abana barangiza amashuri abanza batazi gusoma neza Ikinyarwanda, Minisiteri y’Uburezi yahagurukiye iki kibazo.

Umuyobozi muri Minisiteri y’Uburezi ushinzwe Uburezi bw’abakuze, Muziganyi Espérance, yavuze ko bafatanyije n’abafatanyabikorwa bakomeje ubukangurambaga kugira ngo umuco wo gusoma urusheho gushinga imizi mu Rwanda, haba ku bakiri bato n’abakuze.

Yagize ati “ Kuba izi gahunda zitangiriye ku bana turabona ko ari igikorwa cyiza kuko bizatuma bakura bafite uwo muco. Minisiteri izi neza ko abantu benshi badakunda gusoma ariko niyo mpamvu dushyigikira abakora nk’ibi, muzi ko yatangije umushinga witwa Rwanda Read, muzi n’uwitwa Andika Rwanda ni gahunda za Leta zigamije guteza imbere umuco wo gusoma ndetse n’uwo kwandika, ku bufatanye n’abandi batafanyabikorwa Minisiteri y’Uburezi ifite gahunda yo guteza imbere ibyo byombi; kwandika ndetse no gusoma.”

Ni gahunda ishobora kugira icyo imarira abana mu gihe baba bagize ubushobozi bwo kubona ibyo bitabo gusa hari abagaragaje ko bihenze nyamara Umuryango Save the Children uvuga ko hari n’ibindi bagurira abana bihenze kurusha ibitabo byo gusoma.

Umuyobozi muri Minisiteri y’Uburezi ushinzwe Uburezi bw’abakuze, Muziganyi Espérance aganira n'itangazamakuru
Umuyobozi ushinzwe ibitabo mu mushinga witwa ‘ Mureke dusome’ ukorera muri Save the Children, Catherine Uwimana
Uyu muhango witabiriwe n'abantu b'ingeri zitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE