Sena ihangayikishijwe n’itegeko rirengera abagizweho ingaruka n’amakosa y’abaganga rimaze imyaka ine mu kabati

Yanditswe na Herve Ugirumukunda
Kuya 23 Ugushyingo 2017 saa 09:38
Yasuwe :
1 0

Inteko Ishinga Amategeko, Umutwe wa Sena, yatumije Minisitiri w’Ubuzima ngo asobanure uko itegeko ku bwishingizi mu buvuzi ridatangira gukurikizwa kandi hashize igihe kirekire ryemejwe.

Ni itegeko rifite ingingo zarengera abarwayi bahura n’uburangare, ubumenyi buke n’indi myitwarire itari myiza y’abaganga, bikabaviramo ingaruka nk’ubumuga butandukanye, guta ubwenge by’igihe kirekire n’ibindi.

Umuyobozi wa Komisiyo y’Imibereho myiza y’abaturage, Uburenganzira bwa Muntu n’Ibibazo by’Abaturage muri Sena, Niyongana Gallican, avuga ko ryemejwe n’inteko, rigatangazwa mu igazeti ya Leta muri 2013 ariko kugeza ubu ntirirubahirizwa.

Yagize ati “Ryatangajwe mu mpera za Mutarama mu 2013, ubundi itegeko iyo ryatangajwe ritangira gukurikizwa kuva uwo munsi ryatangarijweho mu igazeti ya Leta; kuba ridashyirwa mu bikorwa ni ukwica amategeko.”

Yongeyeho ko rifite byinshi ryafasha Abanyarwanda na Minisiteri y’Ubuzima ubwayo kuko rirengera uburenganzira bw’umurwayi, rigateganya ubwishingizi ku muntu wahuye n’imikorere mibi y’abashinzwe ku muvura.

Ati “ Iryo tegeko riteganya uburyo warengerwa haramutse hari amakosa avuye ku kuba warangaranwe n’ibindi. Ntibirangirira aho, riteganya ubwishingizi bw’umwuga ku buryo ikikubayeho giturutse ku makosa wakorewe ukibonera indishyi.”

Senateri Niyongana kandi yasobanuye ko Itegeko ku Bwishingizi bw’Ubuvuzi rigena ishyirwaho rya za komite zo gukurikirana no kugena ingano y’indishyi ku murwayi wahuye n’izo ngaruka.

Yakomeje asobanura ko nirishyirwa mu bikorwa ugize ikibazo giturutse ku mivurire atazajya ajya mu nkiko cyangwa ngo asiragire mu nzego, ahubwo ko azajya agana izo komite zikiga ku kibazo cye, zikamugenera indishyi izaturuka mu bwishingizi.

Minisitiri w’Ubuzima, Dr. Diane Gashumba, avuga iryo tegeko ririmo ibice bibiri, ikivuga ku burenganzira bw’umurwayi cyatangiye kubahirizwa ariko hakaba icya kabiri ari nacyo cyaritindije kigizwe n’amateka atarasohoka: irigena ishyirwaho ry’izo komite n’iriteganya igenwa ry’indishyi n’ingano yazo.

Ati “ Icyatumye bitinda ni uko ari ikintu gishya, kizagira ingaruka nziza ariko kigomba kumvikanwaho haba ku bakora umwuga w’ubuvuzi, haba no ku bavurwa. Ni ukuvuga ngo habanje kubaho ibiganiro mu nzego zose bireba n’ibigo by’ubwishingizi kugira ngo buri muntu wese yumve neza akamaro k’iri tegeko n’uruhare azarigiramo.”

Minisitiri Gashumba avuga ko hakozwe inyigo ku bufatanye na Minisiteri y’Imari n’Igenamigambi ndetse na RDB, bareba niba amavuriro afite ubushobozi bwo kuzishyura abakeneye indishyi.

Ati “Ni byo itegeko ryarasohotse ariko amateka yabanje kwitonderwa kugira ngo azashyirwe mu bikorwa asubiza ibibazo aho kugira ngo abe imbogamizi.”

Ni ibisobanuro byanyuze abagize Sena. Minisitiri w’Ubuzima ababwira ko bagiye kwihutisha amateka abura, akazaganirwaho mu nama y’abaminisitiri ku buryo nihatagira igihinduka itegeko ryose rizakurikizwa kuva mu ntangiriro za 2018.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza